Jerita ari rumah panjai

Bekasop enggau Begerai nya dua iku orang bujang ke tebilang. Seduai tu sigi diri menyadi. Seduai disemaka sida serumah baka asam gulai garam. Empa pemanah enggau pangan diri seduai dipeda orang baka ke orang enggau tawing, enda baka diri menyadi. Kini-kini tunga pejalai seduai sigi dipeda sama. Ke ulu sama ke ulu, ke ili sama ke ili. Mandi sama nurun mandi. Nama-nama utai digaga seduai pan sama. Seduai sama-sama besaup enggau pangan diri ngereja sebarang pengawa. Nadai kala sida serumah udah meda seduai beserara enggau pangan diri semadi mih siku nya bira tauka kemi. Pendiau mua seduai pan sama, sama peninggi, tegap sereta bepengerai. Tang ba orang mayuh, Bekasop dipeda nyulut agi laban kulit iya ke chelum lis, kiraka manis agi dipeda ari tudah Begerai. Taja pia tudah Bekasop tu bisi penimpang – kaki kiba iya untut. Penimpang tu enda dipeda mensia mayuh laban Bekasop landik ngelalai pengurang iya nya. Siang malam tudah tuai ngena tanchut panjai. Nadai kala sida serumah meda Bekasop ngena tanchut puntung. Tu mih ke meba runding bala mensia mayuh ba menua iya dia. Tang sida nadai mega kala nanya sereta ngemesaika pekara nya. Bekasop dikerinduka sida serumah laban ngembuan ulah ti manah, semampai bebasa ke orang tuai, enda sumbung, enda jegak sereta enda rindu muai jam dayau-dayau sebarang endur. Nembiak bujang rumah panjai sida dia enda ibuh kira sigi udah nyadika pengawa sida betedayau sebelah ruai nadai sebarang pengawa. Sentang tu mih menyadi iya Begerai bisi dipeda bebida mimit ari iya.

Diatu Bekasop udah chukup umur alai iya bebini. Apai indai iya bisi nguji ngigaka iya bini. Taja pia nadai siku kedeka ati Bekasop. Iya nadai mega madahka kebuah iya tak enggai bebini semuti tak madah diri enda rindu ke indu lalu bedau besedia deka bebini. Tang kitai semua tentu bisi peragam di ati kebuah iya ke enggai bebini. Iya balat nangika resia iya ke bisi penimpang nya ditemu orang. Tang menyadi iya Begerai lain mega ulah. Pagi lemai, siang malam tudah Begerai minta digigaka apai indai iya indu ke bini iya. Tang nasit tudah Begerai enda manah. Genap kali indai iya meresu ngagai bala apai indai indu, anak indu sida selalu bejaku; “Enti aka iya ka kami nerima. Adi iya enggai kami.” Engka udah selatan atur Petara iya ke untut nya ga beruntung agi.

Nyau datai ke hari siti bisi pengerami besai diatur sida semenua dikena ngintuka pengerami pengada tuai pemesai menua. Macham-macham main enggau lumba bisi diatur. Sida serumah nyau sampal ke padang, nyau betambit pintu bekaling alu. Iya ke untut enggau menyadi iya pan sama enggai tinggal ngintu pengerami enggau orang. Seduai iya bisi nirika bansal alai bejualka ai batu, insap enggau sekeda bansa kuih. Menyadi iya nyau baka ulat nangka sekejap kin sekejap kitu nyelepak orang ke besun-sun mayuh bekejeluh ba padang nya. Bekasop enggau ati ti angkun tetap duduk dedugau ba bansal seduai ngintu utai ti dijual seduai. Iya mih ke nerima duit orang ke bebelika utai ke dijual seduai. Nyau bekeseting duit sen tama ke dalam peti. Sehari nya mayuh bendar pekara ti ngeluji ati dipeda nyadi maya pengerami nya. Bisi sekali seraban orang ari ulu bisi undur kia sama enggau meda pengerami nya. Sida sempat datai ke bansal Bekasop enggau Begerai laban deka meli ai batu. Ari penemuai sida nya bisi empat iti gelas pechah diempas orang ulu nya. Sida bedau kala ngirup ai batu. Tekenyit tegepang ati sida sebuat tepegai sereta teirupka ai ais nya. Nyepi nya tak chelap enda berasai jari ngempaska gelas. “Akai rai, asai ke tebabut ngeli kaban,” ku siku ari sida.

Kurang lebih jam satu ngalih hari datai siku indu betupi sereta betudung mua. Semina batang idung enggau mata aja ulih dipeda. Orang ke baka nya sigi balat agi orang bukai deka merati nama agi enti mata nya begenyiling perenching sereta narit ati. “Nyuaka aku kuih buah ulu seringgit, jang!” ku indu nya.

“Endu, nuan tu orang ulukah nya kebuah nuan rindu makai buah ulu tu pia?” tanya Bekasop enggau enda berunding. Enda mega nemu enti tuju ati Bekasop nya deka betundi.

“Ulu pan enda, ili pan enda – sama tengah,” pia ku saut indu nya.

“Enti tetengah nya sama menua enggau aku mih nya,” ku saut iya ke bejual kuih nya.

“Enti udah dikumbai semenua, semenua mih,” ku timbal indu nya baru.

Enda lama udah nya baru Bekasop nemu indu nya diau enggau apai indai ba rumah semak gerija, sebuah genturung menua ti enda jauh ari rumah panjai sida. Iya pan baru mega nemu nama indu nya, Melan, dara nyenggal baru parai laki. Enda berasai indu nya tak narit ati Bekasop. Bulu bansu ke bauh sereta chelum ba atas mata nya ngasuh ati Bekasop balat enda berasai gidan baka daun tepawah laban ribut. Bepun ari nya, Bekasop lalu ngembuan juluk ati deka meda indu nya baru. Bendar Bekasop ngelanggurka chara deka betemu enggau indu nya.

Tiga bulan udah nya, Bekasop tepedaka indu nya benung mandi ba telaga enda jauh ari gerija. Belalauka timpai Bekasop ari jauh iya chukup puas ati sereta besetuju lalu bisi pengerindu lebuh tepedaka liuk tubuh sereta kulit indu nya. Pulai Bekasop ari endur nya iya lalu madahka berita nya ngagai apai enggau indai iya. Naka pengaga ati apai indai iya ninga Bekasop nyau bisi ati deka bebini. Seduai iya pan sama-sama besetuju enggau Bekasop. Nurun mih sida apai indai Bekasop sekaban nanya indu nya.  Peminta Bekasop pan diterima lalu ditangkan empat bulan udah nya enggau pengerami melah pinang. Jadi mih Bekasop enggau indu kedeka ati iya.

Sebulan nampun di bukit pengelama seduai udah jadi, Bekasop lalu bedau bisi ati deka ngulai bini iya tang iya tetap pulai ke rumah, tinduk sereta makai nginyai ba rumah bini iya nya laban iya ke ngugi ke bilik indu nya. Bini Bekasop pan baka nya mega, amat mih iya nya dara nyenggal, tang iya mega agi bisi berasai malu. Tu mih ke ngalitka ati sida serumah. Tang utai ti udu agi ngalitka ati nya adat basa Bekasop ke semampai betanchut panjai belama. Enda milih maya enggau endur. Siang betanchut panjai. Malam mega betanchut panjai. Maya nurun mandi betanchut panjai. Maya gali enda ibuh ngira sigi agi betanchut panjai. Endang baka selama, Bekasop sigi bepekayan genap baju enggau tanchut. Nadai penimpang. Nyau kelama-lama, Bekasop pan udah nemu sereta ngasaika diri diperatika orang. Iya pan berengkah berasai nangi resia iya pansut kelebih agi ngagai bala mentua iya. Munyi ku orang dipelam pan buah rian ditemu mih bau, ditungkus mih abus tekebu mih abu. Puas tudah Bekasop berundingka chara deka ngelepaska diri ari pemalu nya. Nyau kelama-lama baru iya tulihka siti chara. Adi iya mesti mantu iya, ku ati iya bejaku kediri berandau nenggali. Iya pan lalu nulis sepuchuk surat nuju menyadi iya, Begerai. Tu kenu munyi surat nya:

Tabi madi aku Begerai,

Arapka nuan, madi macha surat aka nuan tu lalu minta nuan datai enggau penyampat nulung aku laban nuan nemu aku bisi penimpang lalu aku semampai deka ngelalaika pekara nya. Tang kenyau aku ke udah pindah sereta ngugi ke rumah sida bini aku resia aku nyangka nyau deka ditemu sida mentua enggau bala ipar duai aku. Nya alai aku minta nuan niki pun engkala semak rumah aka nuan nya. Udah nya lalu ngusak pun nya sambil bejaku enggau naka penyarih munyi tu; “Oii! Orang dalam rumah! Enti nuan enda nyaut nuan mati, enti nuan nyaut untut kaki,” beberapa kali datai ke orang dalam rumah aka nuan nya tekanyat.

Nya mih utai ke deka dipadah aku ngagai nuan. Enti nuan enda nulung aka nuan tu tentu kitai sebilik nyengkaum apai indai tua malu.

Nya aja ari aku,

Bekasop.

Baka ti udah dipinta aka iya, Bekasop, tudah Begerai enggau nadai mayuh bantah pan lalu ngereja utai ke diasuh. Seninjik bendar mega malam nya malam ke alai iya ngereja pekara ti dipinta aka iya ujan bangat disempulang enggau ribut biau balai. Maya nya pan udah jauh tengah malam. Semua orang udah jenak tinduk. Malam nyadi sunyi asai ke di dalam kampung jerung nadai didinga ensung nyumbuh bujang, babas pan mega sunyi nadai didinga munyi nyawa orang, iya ga diserumba petang tegayam asai ke diau ba pendam. Begerai pan lalu niki pun engkala lalu ngusak pun kayu nya enggau penapat inat seraya bejaku enggau naka penyarih. Tekenyit sereta takut sida ke dalam rumah nya ninga utai ke munyi nya. Mula-mula mentua Bekasop ke indu tedani ninga utai inggar. Iya lalu ngerak laki iya. “Pai, bisi nuan ninga munyi nyawa orang nya minta saut. Nuan mih nyaut. Enti enda disaut kitai semua mati.”

Saut laki iya, “Iss! Alai nuan mih ngerak menantu kitai nya. Awakka iya nyaut ke kitai.”

Bini iya lalu angkat nuju bilik anak menantu seduai. Iya lalu ngerak seduai sereta ngasuh Bekasop nyaut jaku antu nya. Nama agi dih. Nadai utai dianti nadai utai ditunggu. Kemaya nya mega tudah Bekasop ngeredungkan angkat lalu nyaut enggau naka penginggar. Enda lama udah iya nyaut Bekasop lalu rebah. Tubuh iya lalu gegutak baka orang ke udah kena sakit malaria. Iya pan lalu nyerauh madahka diri sakit. “Akai, akai... mati aku. Mati aku.” Nya sedadat bini enggau apai indai iya angkat meda tudah Bekasop ke nyerauh baka nya. Nyau tegepang tekenyit ati sida sebilik lebuh tepedaka kaki Bekasop. Amat munyi ku antu nya ga. “Enti enda disaut mati, enti disaut untut kaki.” Bekasop laban ke udah nyaut nya alai kaki iya lalu untut. Bala bini sereta mentua Bekasop mesai bulu mata pan enda mih nemu resia utai ke nyadi nya. Kenyau ari nya sida sebilik bebendar ngiga jalai ngubat kaki Bekasop ke untut. Indah malam nya kaki Bekasop ke endang udah sup nya diuntus sereta diubat sida sebilik. Tang semua nya nadai guna. Kaki sigi udah lama untut. Nya ku gaya jerita ari rumah panjai.