Enda aku nyangka

Nama aku Gat. Aku bekereja nyadi jaga ba sebuah villa ti besai. Ninting hari bos aku neriba sebuah kerita ti mar rega kena iya nurun gawa. Udah nyadika pengawa aku mega nabi iya ninting kali iya mansa langkau jaga ke endur aku nyaga. Aku mega nukangka pintu pagar ngambika iya ulih tama. Tang sekumbang aku ke bekereja nyadi jaga sereta nabi iya ninting kali iya mansa asai ingat aku iya tak nadai kala malas tabi aku nya. “ Good morning, tuan,” pia ku aku. Endang enda dikemuningka iya. Nadai mega aku bisi kiruh deka mansik kebuah iya ngembuan ulah ti baka nya.

Bisi sekali bos aku nya tepedaka aku benung nyerungkai kambut uras ba luar villa nya. Aku benung ngeranau begigaka teda pemakai. Enti orang baru meda sigi baka ke keberuran enda makai. Tang baka selama iya nadai bisi ati deka malik ngagai aku. Baka ke enda meda; udah ga nya nyadi ba mua iya empu! 

Aku nemu pengidup kami sebilik endang baka ansar enda betebing, alus enda bekingking; anyut enda tepanggai, labuh enda tepegai. Kati ku enggau dih, pengidup semampai baka manuk; kair pantuk.

Tang bisi mega maya kitai mensia bidik nemu basik enda betulang; untung nemu adung enda bekengkang. Enda mukai-mukai, hari siti aku tepedaka sebuah beg keretas ayan ba endur ke sama alai aku selalu ngeranau begigaka pemakai. Tang beg nya berupai beresi lalu bisi pemakai ba dalam beg nya. Pemakai nya pan dipeda agi baru sereta manah memelan baka ke baru dibeli ari supermarket. Ba runding aku, enda aku tentu kiruh ari ni penatai beg nya. Aku lalu ngambi beg nya enggau ati gaga. Dibai aku pulai. 

Berengkah ari sehari nya aku semampai tetemuka beg ba endur ti sama belama diisi enggau sayur ti agi baru. Semua pemakai ungkup ke guna kami sebilik. Hari siti baka nya, hari siti baka nya. Pekara nya nyau nyadi rutin baka selama. Ninting hari aku bekunsi pemakai nya enggau bini anak aku. Bisi ga aku terunding maya ti kediri berundingka sapa mih orang ke dadak tu?! Selalu amat ajuh tu tau tak enda ingat mai beg iya ke penuh enggau pemakai ninting hari.

Enda mukai-mukai bisi sekali nyadi mih siti penanggul ti besai nyadi ba villa. Sida madah ngagai aku bos aku udah belayar midang. Sehari nya mayuh amat bala temuai ngesah penusah ti nyadi ba villa nya. Sehari nya mega aku enda manah nasit. Aku nadai tulihka pemakai baka selama. Beg ti seruran ayan udah nadai agi ayan baka selama, lesap tengelam puting. Tang ba peragam ati aku nyangka siku ari temuai ke datai nya udah ngambi beg pemakai nya.  Tang enda ga patut ku ati aku din bejaku kediri berandau nenggali. Pekara ti sama mega nyadi hari siti lalu ditangkan maya hari kedua, ketiga enggau keempat. Hari beganti hari, beg ke perisi penuh pemakai udah nadai ayan, lesap enda temu tunga. Sapa mih ajuh ke ngambi nya. 

Utai tu terus nyadi senyadi datai ke seminggu. Aku nyau berasai sinu kediri laban nadai tulihka pemakai dibai pulai ungkup kami sebilik. Sida di rumah pan semampai nanya sereta nganti enggau ati ti gagit baka ke nganti indai pulai ari umai. Berita tetap sama. Pagila, lusa, lupit, tulat tetap sama. Dipeda mansang gedang-gedang tang maya pulai tak gendai-gendai. Ketegal nya aku lalu mutus ati deka berandau enggau bini bos aku pasal gaji. Aku bisi ati deka minta gaji aku ditiki dikena mansi pemakai ke seruran enda chukup. Enti enda aku deka ngemaduka diri bekereja nyadi jaga.

Sepengudah aku madahka pekara nya ngagai iya, iya pan tegepang tekenyit ati. Mimit pan iya nadai naga aku tau nanya pekara nya. Iya lalu nanya kebuah aku enda kala madahka serebana diri pasal gaji dua taun ti udah ngagai laki iya. Nama kebuah baru diatu gaji aku tau tak enda chukup ku iya nanya aku. Aku enda terus nimbal iya. Ati aku bisi berasai sinu. Sinu ngenang pemerinsa diri. Pending berasai angat, asai ke dichal enggau chabi. Aku nemu pendiau diri. Agi mega aku tu bansa orang ke enda lanchat minta. Aku nguji madahka mayuh dalih tang siti pan enda ulih diterima iya. Kiraka enda pakai umbuk aku mih nya!

Nyau kepuas ke nguji madahka dalih diri aku lalu terunding deka madah pekara ti amat nyadi ba aku. Aku lalu madah ngagai iya pasal beg pemakai ke ditemu aku ninting hari lalu nyadika pemakai kami sebilik. Iya lalu nanya kemaya pemakai nya putus. Aku nyaut madahka sepengudah laki iya parai. Kenyau ari hari pemarai bos aku lalu nadai meda beg pemakai nya agi. Nama mih aku enda tepikirka pekara tu kini?. Kada enda bos aku nya ke nyediaka pemakai nya ke aku? Dipelaba aku iya mih nya laban ngelama tu aku nadai nyangka orang ke enda malas tabi kitai nya orang ke kemerah sereta siru enggau orang! Enda aku nyangka bos aku nya baka empeliau semampai deka beduaka iku.

Udah mendingka cherita aku nya, bini bos aku lalu nyabak duie-duie. Tebelenga lilih aku meda iya tak nyabak tuai. Tak ngenyit mih tudah aku baka orang ke seranta jaku, teketu baka puyu mabuk ambuh. Nyau kepuas ke sengian baru aku bejaku.  Aku lalu ngumbuk iya ngetu nyabak. Aku mega minta ampun ngagai iya laban minta gaji niki. Aku nadai nyangka nya laki iya ke nyediaka aku pemakai nya. Kenyau ari sehari nya aku lalu terus nyadi jaga. Ati aku lantang laban ulih meri servis ngagai bos baru aku.

Udah ke puas nyabak baru bini bos aku bejaku baru. Ku iya, “Aku nyabak ukai ketegal sinu nama-nama tang laban baru sehari tu aku tetemuka orang ketujuh ke diberi laki aku pemakai. Aku nemu tiap-tiap hari laki aku meri pemakai ngagai tujuh iku orang. Ngelama tu aku udah tetemuka sida ke enam iku nya. Puas aku ngiga sapa iya ketujuh nya. Lalu baru sehari tu aku nemu. Nya mih kebuah aku nyabak gaga tetemuka orang ke ketujuh.” 

Kenyau ari sehari nya, aku berengkah bulih beg ti penuh enggau pemakai. Tang kesekali tu anak bos aku nya ke nganjung terus ke rumah aku. Taja pia, ninting kali aku meri terima kasih, sigi enda dikemuning iya aku. Baka ulah apai iya mega. Engka nya mih ke dikumbai orang labang apai labang anak! Sigi nadai nyaut seleka mukut, nadai malas seleka beras.

Bisi sekali laban ke udah leju meda ulah anak bos aku, aku lalu nyebut jaku TERIMA KASIH ngena nyawa ke inggar! Enda aku nyangka sekali tu lain ari selama. Terima kasih aku nya tak ditimbal iya. Tekenyit aku ninga iya tak nimbal. 

Ku saut iya, “ Anang nuan ngambi ati enti aku enda nyaut nuan, laban aku bisi penanggul enda ninga baka niang apai aku empu!”

Oh! Ku ati aku din. Nyau asai ke deka runtuh. Ngelama tu aku selalu salah sangka, salah peragam nadai nemu cherita ke amat kebuah apai iya ke enda ngemuning aku ngelama tu. Kenyau ari sehari nya aku enda ensiban ati enti anak bos aku enda nimbal jaku tabi aku.