Orang tuai ari Sungai Besai

Jerita tu nyadi maya aku deka ke Sungai Besai ari pasar Nanga Lutak. Kala mega aku ninga orang meri jaku lalau ngasuh bejimat enti bisi siku orang tuai minta deka numpang kerita kitai. Hal tu ku sida suah nyadi aba stesyen minyak Petronas Sekinchan.

Tu mih ke nyadi ba aku empai lama ti udah. Pekara tu nyadi maya aku ngetu lebuh ke bekerita pulai ke Sungai Besai udah ke baum ba pasar Nanga Lutak. Ketegal balat bendar asai ke deka ngantuk dia aku mutus runding deka ngetu belelak ba stesyen minyak Petronas, Sekinchan.

Maya aku ngetu belelak dalam kerita dia datai mih siku orang tuai, begari kamah. Iya lalu nengkau aku. “Dek deka kini, anak?” Tekanyat tegepang ati aku ninga bisi orang nanya. Aku lalu nurunka cheremin kerita. Aku lalu nyaut iya pandak aja saut aku. “Sungai Besai, aya.”

Orang tuai nya pan lalu nanya baru. “Kati ulih aku enggau dek anak, numpang sampai ke Sungai Besai?” Aku laban ke lelak sereta ngantuk enggai bepikir panjai lalu nyaut iya tekala nya. “Ehmm... tau ga.”

Orang tuai nya pan lalu tama ke kerita aku. Aku ngumbai iya duduk ba mua enggau aku. Enda ngawa mega ku ati ku din. Asai ke deriba teksi ga aku. Dalam ati aku din tak bejaku kediri berandau nenggali, “Sapa mih orang tuai tu kini? Orang tauka ...,” Pia ku runding aku. Tak bediri bulu pegu aku jamah runding aku empu nya. Sepemanjai jalai orang tuai nya endang enda memunyi seleka jaku.

Aku lalu majakka pejalai. Laban ke udah ngetu sekejap tadi dia kiraka nadai tentu ngantuk aku. Ditambah aku mih pengelaju pejalai kerita ngambika jampat datai. Ukai nama laban bisi penangi mega aku ke orang tuai ke duduk di belakang.

Kurang lebih dua kilometer agi nyau deka datai ba Sungai Besai dia orang tuai nya pan lalu nanya aku.

“Anak, dek deka kaya?”

Tekanyat baru aku. Asai ke runtuh dada aku. Nya turun darah mua. Sekali tu laban ti ninga tanya iya munyi nya. Nadai naga orang tuai tu tak empegal nanya aku munyi nya. Lalu berunding mih aku dalam ati. “Nama enda utai ku orang tuai tu? Tau tak empegal deka nanya enti aku deka kaya tauka enda. Kada enda tak semina deka nguji aku aya tu,” ku ati ku din.

Aku pan lalu nyaut iya enggau penuh basa sereta bejimat, “Enda ngawa aya, idup numbas iya jelan pengulih baka kediatu pama mih. Enggaika pengaya nya lagi tau ngasuh kitai nyau enda ingatka penatai diri,” pia ku aku.

Engka ninga saut aku munyi nya dia orang tuai nya enda nibas seleka beras, enda nyaut seleka mukut. Dalam ati aku din sangka aku saut aku nya mih pengabis engkeman takutka iya nya semina nguji aku aja.

Enda lama udah nya kira-kira bisi sebatang ruku dinga aku orang tuai nya pan lalu bejaku baru. “Anak, dek deka kaya?” Aku pan lalu nyaut nya munyi saut aku ke keterubah tadi.

Enda lama udah nya kami duai pan datai ba Sungai Besai. Datai dia, orang tuai nya pen lalu minta dileka dia. Sebedau iya pansut ari kerita iya pan lalu bejaku baru. “Nak, nya aya dek tu bisi ninggalka seput KAYA chap Yeos nyadika tanda terima kasih aku suh dek laban dek anak udah ngemai aya dek tu kitu. Terima kasih au anak.” Orang tuai nya pan lalu pansut ari kerita aku. Aku pan enda tesautka jaku iya nya. Enda nemu baka ni deka nimbal jaku iya.