Pengaruh

Langit pagi begamal bajik, memelan baka Kumang ke datai ari Gelong Batu Nakong Nyinggit Nyenggung Ngelentik Punggung. Gentilang remang benung bejalai buruk, begadai-gadai ensuruk langit kebung. Agi dipeda anak bulan baru mesai taring babi. Hari pagi nya endang chukup manah sereta terang amat taja pan jam ba dinding baru nujukka pukul lima empat puluh lima pagi.

Angin pagi chukup chelap asaika nusuk ke dalam tulang tau bendar ngasuh isi berasai dadam. Indai Endu lama udah angkat laban ke puas ninga entua iya kutap-kutap sambil ngilum pinang. Batuk entua iya baka ke nyindir Indai Endu ngasuh angkat berapi.

Tak semadi Indai Endu angkat laban ke ngenang pemedis ati meda entua iya ti selalu enda puas ati ke semua kereja iya. Bekeranding munyi pinggai mangkuk Indai Endu ke benung berapi sambil mut-mut dalam ati nyumpah entua iya.

Indai Endu seruran enda puas ati laban udah bendar amai makai asi belaukka ai mata. Ati ringat, ati muras Indai Endu ditambahka bala Pulau bekerakam enggau pangan diri ba baruh rumah. Indai Endu lalu berumban ngambi asi chelap. Pia ke berapi pia mega ngangauka sida Pulau lalu meri sida makai. Bala Pulau pan enggai laun makai, taja pia sida iya mih ke pemerani aku, ku Indai Endu bejaku kediri, berandau nengali.

Chukup sikar Indai Endu, endang baka kilat penyampat iya ngereja pengawa baka kilat ngelambai petang tak semampai laju baka peluru leka senapang, deras baka upas kesulai tandang. Sekejap peda udah ba pangking Indai Endu ngerak bala anak iya. Munting nyabak digerak laban ti agi deka ngaga tai mata.

Sida tiga menyadi nya mih anak ti nyadi chunto orang ba rumah panjai sida. Pendiau sida menyadi nadai endur mantah nadai endur mejah. Sida tiga nya tadi lalu ngeredungkan angkat enggau sabak-sabak. Baka selama lebuh sida udah dani ari tinduk sida menyadi sama ngereja pengawa diri empu.

Endu laban ke indu lalu berumban enggau indai iya ngaduka utai ba dapur. Munting lalu nyengkau umpan manuk lalu terus nengkani manuk makai. Sambai empungas mua sambil nyeling belalai, ini iya ke benung merunsaika sarang pinang laban ke deka makai pinang.

”Redai gari,” ku ini nyapa enggau sada nyawa ti chukup lunak.

”Auuu.. ini,” ku Sambai, “Ini nama pagi tu chelap amat?”

”Nya mih tanda hari sehari tu manah uchu sereta nya mih utai disampika kitai ninting pagi hari.”

”Ini… aki udah angkat?”

”Bedau uchuuu… Kapa enda tinduk aki nuan dih, lelak iya gawa kemari.”

”Peda ini, gerak aki, kitai deka makai tu.”

”Auuu… uchu.”

Ini angkat lalu kutap-kutap meda laki iya laun amat dani.

”Tuba dani, Tubaaa daniii.. arghh. ” ku ini.

”Ya nama dih, agi deka tinduk mata tu,” ku Tuba ringat digerak ini Sambai.

Tuba laban ke enda tentu mayuh jaku lalu nguji angkat. Tak semadi Tuba angkat pagi nya. Tambah mega bala uchu inggar amat ba bilik dapur baru tudah tuai nguji angkat. Tak berat kaki disingkangka. Katika enda laban rumah panjai sida tak tiga genturung pendiau. Bilik besai begulai enggau ruai sereta kaki lima. Bilik pangking ba tengah kira sesingkang Bungai Nuing tang enti enggi kitai kira mih tujuh singkang entara rumah.

Bilik dapur besambung enggau pangking tang enda sama perabung. Nya mih ngasuh rumah panjai sida Tuba chukup manah dibandingka enggau rumah orang bukai ba pelilih menua sida. Pemanah rumah panjai sida selalu nyadi buah mulut orang maya ke berandau pasal rumah. Rumah panjai sida mega kala menang pekit pemanah rumah panjai pelilih menua Sarikei.

”Akiiiii…. makai,” ku Munting ngangau enggau nyawa inggar munyi guntur maya kudi, laban aki iya bengal beruang.

“Duluuu uchu… Aki deka ngabas perau ke ai.” Aki iya nyaut lembau.

Tak semadi Tuba angkat laban ke pedis patung sereta punggung. Tuba angkat lalu kutap-kutap serabanaka pemedis tak enda nemu suman. Makin tuai makin pedis. Makin tuai majak enda nyamai gerai. Seput-seput Tuba nurun tangga pendai. Ama niki ama nurun.

“Merinsa mega tangga tu, gigi mayuh udah tanggal nyau baka ngeli aku ke udah tuai lukai tu,” pia ku Tuba mutapka diri.

”Akiii…jimat nengah tangga nya,” ku Janggung nyada ari dalam rumah.

”Auuu Uchu, tangga lalu enda diaduka kita, engka nganti kitai udah patah kaki patah jari labuh ari tangga baru deka ngadu kini.”

”Ukai pia aki, kitai serumah benung sama nadai hari, sama berumban ngetau enggaika padi repi.”

”Ngerumban padi pan, tangga mesti mih diaduka dulu. Ni berat agi uchu, seput tauka padi?”

..................................................................................................

”Empai pulai aki?”

”Ku mih tu uchuuu.., nganti udah temu nimba perau.”

Nama mih hari tu enda nemu ngetu ujan. Tak bejarit hari nadai belanggang. Tak nadai meri peluang panas sehari ga ku Tuba alam ati iya bejaku kediri berandau nenggali. Iya pan lalu mulaika diri. Datai iya ba pala tangga Tuba lalu ninjau pemanah rumah panjai sida. 

Amat mih ku jaku orang ngelama tu, amat manah rumah panjai kami. Ukai rumah aja manah tang kami serumah mega idup seati sekunsi, segulai sejalai baka kayu saum dan saum takang. Pengawa bumai betaun sereta pengawa bukai tetap mujur dikereja laban kami serumah tetap besukung betulung magang semampai ngereja pengawa beripai enggau diri serumah.

Tambah mega ke ngempung perabung kami nya ukai orang bukai tang Lanting ke amat pandai ngaraup rayat redak kami serumah. Ukai aja orang sekayu ai muji pemanah rumah enggau kaul kami tang YB selalu didinga bejaku ba rumah bukai muji pekara ti sama, ku Tuba berunding kediri berandau nenggali.

Kiraka nyau sebatang ruku Tuba pan mulaika diri ari ai, baru iya datai ba tanju rumah sida. Tuba enda nemu nama utai ke patut digaga. Iya ngetu ba mua pintu ruai malik ke setak ulu lalu malik ke ili. Iya temati kutu baka puyu mabuk keruh, tak tegenung baka empelekung mabuk keruh. Dinga nyawa bala sida ari ili ngangauka uduk mai nurun kereja ditampung enggau bala sida ari ulu betarauh deka meri uduk sida makai.

Mayuh mega sida serumah udah nurun kereja. Sida serumah bagas amat enti disebutka hal gawa sigi semampai nurun pagi lalu pulai nyau malam. Tambah mega, sida serumah enda kala suntuk pemakai. Padi ke diempa, padi ba umai langgang ngelima taun.

Ruai tuai rumah udah disediakan baka selama. Semua utai ke dikena baum udah diaduka magang. Lemai nya Lanting ngasuh mandal iya Empangup nesau sida serumah.

Lanting nugungka sida serumah laban bisi ninga cherita ti enda tentu manah nyadi ba rumah sida. Sida serumah mupuk irau lalu betanya pangan diri.

”Nama kebuah mandal nesau kitai? Asai aku bisi lima taun kita serumah udah nguan rumah panjai tu. Tak nadai utai ngawa nadai utai pedera rumah kitai. Chukup chelap lindap gerai nyamai.” ku Empangup madahka Unggan.

”Asai sepi aku pia mih mandal, tak kur semangat rumah kitai tu,” ku Unggan nyaut.

”Nama tak tua aja ke udah datai ba ruai tuai rumah tu dih. Ni sida bukai?”

”Engka benung nekuka lengan bala bukai. Sida Janggung sebilik tak baru niki, kelalu bagas nurun terebak tawas pulai enda kelala mata achuk.”

”Uji nuan beratika pemagas bala kitai serumah gawa. Lalu ga enda kaya. Umai sekayu ai sungai, kereja enda nemu hari malam panas sereta ujan. Agi ga baka nya pengidup kitai. Enti kitai mandingka enggau bansa bukai, kelebih agi bansa China umai sida semina mesai tikai peramban aja lalu kereja setengah hari pan ulih idup kaya raya. Nama kebuah bansa kitai enggai ngubah chara idup ngambika kitai ulih maju setipak enggau bansa bukai bediri sama tinggi duduk sama baruh.”

Kira seilum pinang, Empangup enggau Unggan ke berandau peda nyau deka serampur sida serumah datai baum. Lanting lalu nerakan bediri ngesaika bulu siga muka licha.

Lanting minta sida serumah kelebih agi sida ke indu becherita pasal utaika nyadi ba rumah sida pagi tadi.

Indai Endu laban ke sikar ari sida indu bukai angkat bediri lalu becherita.

”Pagi tadi sebedau kami menyanak nurun ke kebun aku bisi meda siku burung terebai ari setak ili terus ke puding setak ulu.”

Sida serumah sama enda engkeretik lalu bepereningka pangan diri. Jarum labuh pan didinga semaka jaku. Empai abis Indai Endu bejaku.

Tuba narik seput panjai dulu lalu bejaku nanya runding sida serumah.

”Akiii.. utai tu patut diaduka kitai.” Janggung empelah aki iya.

”Aduka baka ni,” ku Lanting.

”Kitai patut ngemali rumah.”

Janggung taja pan agi bujang baru lanjau tang runding iya chukup tajam sereta ngembuan penemu ti chukup manah. Adat asal Iban endang semampai ditemu iya.

”Amat ku unggal nya,” ku Empangup. Suba sida ba Nanga Sekasai laban ke enggai kiruh ngaduka utai baka tu, mayuh penusah tau nyadi ngujungka nyawa tiga iku sida serumah bebadi.

”Enti semua setuju, pagila aku ngasuh Empangup nyadi tuai ngambi orang ngemali rumah kitai.” 

“Setuju kita kini?” ku Lanting.

Bala sida serumah sama enda memunyi, tak bela sengian asai ke diau dalam kampung jerung nadai didinga ensung nyumbuh bujang, kampung sunyi nadai didinga kesui nyawa orang, kampung puang nadai didinga wok empeliau arang. Meda baka nya Lanting nanya sida ari baruh setuju. 

“Setuju…setuju nadai bala enda setuju,” ku Janggung.

Tembu berandau lemai nya sida serumah sama mulaika diri lalu beratur deka tinduk labanka kelalu lelak gawa sehari-hari nya. Enti baka selama endang tumu mih sida serumah tinduk tang ke malam nya sida bisi laun mimit laban ke bisi baum.

Udah makai pagi sida sama bela betanyaka kenyap pangan diri. Semua madahka diri nadai utai nanggul lalu ngembuan kenyap ti manah.

Lanting pan magi sida serumah lalu ngerah sida ngereja pengawa nitihka atur dikena nyediaka pengawa ngemali rumah lemai legi. Lemai nya semua sida serumah sama udah besedia, kira jam enam tiga puluh lemai pengawa ngemali rumah pan berengkah. Tembu pengawa, sida serumah sama nadai ragak agi.

Hari siti semua sida serumah diau memagang. Hari kedua baru sida serumah gawa baka selama. Sida Indai Endu sebilik sama bela kiruh nyediaka diri deka nurun ngereja pengawa sehari nya.

”Sambaiiii.. bai kitu sarang pinang akuuu, ninga dek. Anang murihka Jedun tak enda berumban angkat enti orang ngasuh.” ku Ini ngangauka Sambai.

Indai Endu ke benung berapi di dapur tak berasai angat pending ninga, berasai turun darah ke mua. Mua iya merah baka ke udah laban panas raya, baka undai ke dipansai sereta disumai ini Sambai. Ati iya chukup pedis asai ke ditusuk semilu.

Dalam ati ukai main indai Endu nyumpah entua iya laban ke enggai dikumbai Jedun. Ba menua sida, Jedun tu siku indu ti nadai utai ulih digaga, indah gamal pan nadai endur nyema.

Indai Endu enggau entua iya endang enda ulih bagulai kenyau ari indai Endu ke milih diri deka idup sekunsi enggau Unggan. Mimit-mimit utai besindir lalu ngujung ke bekerakar. Ulah seduai endang tak baka mayau enggau ukui.

Entua iya endang enda setuju amat seduai jadi melaki bini. Ipar bilik sepiak-piak pan nadai tentu deka meda Indai Endu. Sekayu rumah semina bini tuai rumah aja ti agi deka begulai sereta meda indai Endu.

Semua jaku orang nadai enda ke nyindir iya aja-aja. Nadai utai ke betul dikereja tudah indai Endu. Indah maya ngerara bala anak iya pan, entua iya masuk champur baka buyah ke nabak diri ke api. Ngujungka seduai iya amat baka sempama uduk enggau mayau, jarang bendar begulai tauka betanya pangan diri.

Seminggu bekau udah ngemali rumah, bisi dua hari tudah Tuba enda angkat. Nadai nemu kebuah. Meda baka nya anak iya Unggan deka nguji ngemai iya ke hospital.

”Apai beradu nuan. Aku tu deka nganjung nuan ke sepital negi.” Pia ku Unggan bejaku sambil ngasah duku.

”Udah raya orang baru deka mai ke sepitar. Ya lapa enda ari ngelama tu dih.” Pia ku indai Unggan nyaut ari dapur enggau munyi jaku ti nyindir. Tak tajam munyi jaku indai iya pagi nya.

”Enda ibuh pan jang, ukai penyakit diubat ba sepital tu. Endang penyakit dibai ari kelia munya. Lemai legi uji ambi ke aku manang.” ku Apai Unggan. 

”Auu ga apai enti nuan udah munyi nya.”

Lemai nya belian mih sida Unggan sebilik. Belian ke Tuba apai Unggan. Maya ke belian, manang madahka apai Unggan nya bisi kena pansa utai orang. Unggan ngasuh apai iya begatak lalu ngelalau enda ngasuh apai iya kelalu arap ke jaku manang.

Agi mega ku penemu Unggan manang nya semina ngabung orang belaya aja. Pengudah belian, enda ga apai Unggan gerai. Penyakit iya makin pedis-sepedis. Suah mega unggan nguji ngumbuk apai iya ke hospital tang genap kali ke nguji ngemai dia apai iya seruran madahka diri enggai.

Meda baka nya Unggan lalu ngasuh bini iya ngumbuk apai iya. Indai Endu lalu nguji ngumbuk entua iya. Apai Unggan nadai mayuh jaku engka malu diansak menantu iya tauka penyakit majak pedis-sepedis.

Unggan enggau bini iya lalu nganjung apai iya ke hospital ba Sibau, Pasar Maling. Datai di hospital, dutur madah apai iya semina sakit dibai iya kelalu bendar gawa. 

“Enti udah diberi ubat gerenti gerai.” ku lutur. Lutur nya lalu meri ubat Vitamin B Complex.

Meda agi pedis apai Unggan enda enggau seduai iya pulai ke rumah tang diau ba anak iya ke nyadi kerani ba pasar Julau. Bisi dua hari enggai iya diau ba anak iya dia, apai Unggan pan bisi berasai nyamai. Tubuh berasai lempung sereta tulang berasai kering.

”Amat mih ku Unggan nganu aku, manang semina pandai ngabung orang belaya aja,” ku Apai Unggan alam ati.

Tembu makai lemai nya, indai Endu kiruh bendar ngelipat sereta nipan gari sida sebilik. Sigi sebengkah pengawa ti seruran digaga pama ninting lemai. Benung ke kiruh nya, ati indai Endu asai ke runtuh baka kacha ti labuh ke geladak ninga entua iya nanya utai ke enda disangka-sangka.

”Nama bisi nuan ngambi duit sida Apai Janggung sepiak?” ku Entua iya nanya.

Indai Endu temati kutu baka puyu mabuk keruh lalu enda bejaku sebatang ruku, enda malas seleka beras.

”Nama nuan enda bejaku? Bisi nuan ngambi duit orang?”

”Ya kemaya duit nya lenyau lalu dini alai iya engkah?” ku tanya apai Endu nguji masuk champur.

”Aku ukai nanya nuan apai Endu, aku nanya Jedun.”

”Madah mih indai Endu enti nuan amat bisi ngambi, awakka aku mayar iya.” Ku Apai Endu.

”Aaakuuu… nadai ngambi duit nya. Anti aku bisi ngambi duit nya tau busung aku. Mati mih aku.”

”Alu besumpah iya enggau kitai ke tuai. Mimit nadai mih nuan bebasaka mentua nuan tu.” Entua iya majak nuduh indai Endu.

”Aku amat enda indai, kati ku aku deka ngaku dih?”

”Udah mih nya, orang ninga kitai betalat. Malu didinga orang negi.”

Ninga jaku apai Endu, seduai iya sama-sama baka api ke ditanyah ai lalu padam sedu, badu engkeritik. Pengudah nya sida serumah sama nyangka indai Endu bisi ngambi duit sida entua bilik sepiak.

Sampai ke anak mit pan nyebut ngagai bala anak iya madahka indai sida Munting ngenchuri duit orang. Unggan laban ke enggai belaya enggau orang kelebih agi diri sekaban lalu mai sida betugung lemai nya, beranchau tikai.

Udah tembu makai lemai nya sida lalu belabuh betugung. Tuai Rumah Lanting lalu minta Apai Janggung becherita utai ke nyadi. Udah nya tuai rumah nya lalu nanya indai Endu laban iya ke balat disangka orang.

Indai Endu endang mati-mati madahka diri nadai ngambi duit. Meda baka nya tuai rumah lalu nanya runding bala mayuh jalai ke patut dikena mutar sereta ngatur penyarut nya.

Janggung angkat lalu bejaku, ”enti baka nya aku mai sida cheluk betung.”

”Anang wat kita ukai orang bukai, enti amat duit nya lenyau sereta amat bini aku ngambi, aku mih mayar duit kita. Enggai mih aku belaya.” Enggau nyawa alus Unggan ngemaruhka diri.

“Iya mega enda ngaku kati ku enggau dih. Diatu, kita sigi enda belaya enggau orang bukai endang enggau diri sekaban ke enggau belaya. Orang bukai ukai nya begulai enggau kitai.”

”Wat…wat.. anang mih baka nya.”

Enggaika makin nyadi-senyadi, tuai rumah angkat lalu ngasuh seduai ngetu bejaku. Kati ba runding nuan indai Endu?” ku tanya Tuai Rumah Janting.

”Barang ku nuan mih aya. Nuan ga tuai rumah. Agi mega aku enggai nyadi nakah penemu orang laban aku orang tampil. Legi majak orang ngangkai aku,” ku indai Endu minta kasih.

”Nadai jaku nya ... pagila cheluk betung mih kitai.”

”Enti baka nya wat, aku enggai enda ngajar kita. Sebarang pemutus cheluk betung pagila kita sama-sama nitih lalu anang mayuh jaku. Sapa salah tetap diukum. Pia mega laban kitai ke ukai orang bukai anang nyima ati ngagai pangan diri.” Pia ku lalau tuai rumah sida.

Unggan lalu nibarka jaku ngagai bala mayuh. “Baka nya mega kitai serumah, enti udah putus pengawa pagila kita sama anang nampungka hal tu agi ngambika kitai ulih begulai manah enggau pangan diri sereta gerai nyamai baka selama.” 

“Nya munyi penemu sida lalu aku arapka kita sama berati sereta nyaga mulut diri. Terima Kasih.” Tuai rumah lalu nudukka diri.

Malam nyau makin tuai baka penemuai aki sida Munting. Sida indai Endu sebilik sama tinduk jenak laban ke kelalu lelak. Indai Endu berasai gaga lebuh ke betemu enggau sida menyadi iya. Dini iya enda gaga laban bala menyadi mai mayuh macham utai lebuh ke nemuai ngagai iya. Utai ke dibai sida semua utai ti dikedeka iya. Indai Endu tekenyit kena tumpu Munting lalu tedani.

Enda berasai hari pan tekerebak tawas. Baka selama indai Endu ngereja pengawa nitihka atur nadai siti timpang lalu enda dikereja iya. Pagi nya indai Endu chukup gaga dani laban malam tadi kenyap iya chukup manah.

Empai tentu temu pengawa iya pagi nya indai Endu lalu ngerak laki iya sereta nelai madahka kenyap diri.

”Emmm.. manah mih nya, ambi orang nemu nuan enda ngereja utai jai ke disebut orang.” Saut apai Endu lembau.

Kira setengah tanju empa panas lalu gelegar pan udah rangkai, semua utai ke dikena cheluk betung udah sedia lalu bala mayuh udah ngambi endur alai nyamai meda.

Enda lama peda tak rayap-rayap apai Janggung mai chapak berau kuning. Datai dia iya lalu naburka berau kuning sereta besampi ngangauka bala petara minta tulung minta sukung. Tuai rumah lalu ngasuh seduai sama besedia laban ai ke kena cheluk betung udah gurak-gurak gesak merudak dalam periuk temaga.

Indai Endu nadai mayuh leman. Iya lalu mansang enggau tubuh murus tubuh untus nadai dinding bulu tak semina ngarapka kenyap malam tadi. Taja pia iya besampi dalam ati laban ke udah sembiang minta Allah Taala ngelindung ngerayungka iya ari semua utai jai.

Tuai rumah nerangka sekali agi tuju pengawa sida sehari nya taja pan demalam semua sida udah nemu lalu nakan sida.

”Sapa salah tetap diukum. Udah sedia.. Satu dua tiga,” tuai rumah pan lalu ngasuh seduai masuk ke jari dalam ai gesak nya tadi.

Baru dicheluk ke dalam ai, peda apai Janggung tak jampat-jampat narit jari iya. Tunjuk jari iya nyau berupai burak.

”Akaiii.. ! pedis amat jari aku.” Ku apai Janggung enda berasai engkakai madahka diri pedis.

Meda apai Janggung engkakai-kakai, sida serumah pan sama bela alit ati. Tang jari indai Endu mengkang dalam ai angat ti gesak tadi.

Tuai rumah lalu ngasuh indai Endu ngetu. Iya lalu ngatur adat.

”Nuan apai Janggung salah laban nyangka orang sebarang. Nuan tu kena tinggang adat mukul lapan, papung besi siti, manuk baru lanjau siku enggau sigi tajau. Lalu kitai serumah bukai anang mayuh jaku agi laban utai tu udah putus. Pia mega aku enggai kita main tuduh-tuduh enti nadai chukup bukti. Sapa agi nyebut utai tu udah tu ila deka diukum.”

Iya nyapai kereban ukum tadi lalu ngeselan diri sereta ngasuh bala bukai nunda iya. Tembu pengawa, tuai rumah lalu nudukka diri.

Taja pan udah chukup ditangkan, sida serumah seruran enggai meda sida apai Endu menyanak. Tiap hari seduai melaki bini nerima jaku jai, nyadika buah randau, disindir sereta diperatika sida serumah.

Apai Janggung semampai enda puas ati lalu berundingka chara ngiga orang ti ngambi duit iya. Janggung nelai apai iya, ngasuh apai iya ngagai Apai Kana ba Lubuk Sekerupuk meda enggau chara beliau.

”Apuu.! Amat mih nya,” ku Apai Janggung tekenyit.

Diabas enggau beliau peda amat indai Endu ke ngambi duit. Nya ti ngasuh Apai Janggung pedis agi ati lalu ngujungka iya sakit. Udah tiga hari sakit, iya pan enda ulih angkat. Makai enggau ngirup pan nadai.

”Kada enda dipengaruh iya aku tu,” ku apai Janggung narit seput panjai.

Sida serumah sama bela kiruh, apai Endu enggau indai Endu pan sama enggau orang ngintu apai Janggung ke sakit. Macham-macham chara dikena sida ngubat iya lalu enda mega tudah tuai nya gerai.

Ngambi manang udah. Ngiga beliau udah. Ngiga dukun udah. Ngampun pan udah. Begawai ke tanju udah. Bepuchau pan udah. Nadai enda chara ngubat lama udah dikerejaka ssida serumah magang. Bai ke hospital lalu enda mega berinsur manah. Ba hospital apai Janggung enda temu orang penyakit. Nya nambahka sida udu agi nyangka iya sigi kena utai orang tauka dipengaruhka indai Endu. Penyakit iya tak lalu nadai berubah manah. Nya kelama-lama iya nyau enda ulih bejaku agi. Mata iya aja ke peli-peli.

Tumu pagi siti Empangup enggau Janggung undur ke pasar diasuh orang bepesan. Kaban belayan ke ninga pesan sama bela datai ngabas apai Janggung. Empa pemayuh kaban ke ngabas mayuh ga penemu diberi.

Sekeda nya ngasuh mai iya ke hospital. Bisi nya ngasuh mai ngambi manang baru, berubat ngena chara beliau, berusut ubat ke dibai, ngampun enggau mayuh chara bukai dikereja ngichaka apai Janggung nya gerai. Tang apai Janggung tetap nadai berinsur manah. Penyakit iya tak nadai ngiji nyau ngujungka iya lalu mutuska seput.

Maya ke ngintu pemati apai Janggung bala mayuh sama-sama nyangka sida indai Endu munuh iya ngena pengaruh. Leka sabak orang semua mangki sida indai Endu sebilik.

Taja pia, Indai Endu tetap nadai pedulika semua jaku jai orang laban iya amat nadai ngereja utai nya. Tengah malam keterubah lebuh ke ngintu pemati apai Janggung, sida serumah sama tegepang ati meda bala sida Janting, iya nya orang rumah panjai ari ili sida tak gesah-gesah datai kia.

Tang sida enda terus becherita. Lebuh ke ditanya nama pejalai enda mega sida madah.

Kira sesempa ilum pinang baru Janting nerangka utai ti nyadi ngagai sida Tuba.

” Nama hal sida laki aku? Nama penyadi sida iya?” ku ini Endu nanya enggau ati kesal ati rawan.

”Sida iya karam ba Wong Adai.”

”Idup sida iya Janting?”

“Tuba lemas lalu empai ditemu,” nyau katat-katat jaku Janting mantaika berita nya.

Ini Endu tekala nya rebah lalu luput. 

Meda iya luput sida lalu segaut ngidupka ini Endu, nadai ngira agi niang Apai Janggung ke benung disenggaika sida. Malam nya mega Lanting mai sida berandauka utai ke patut digaga sida serumah.

Laban ai bah semua bala setuju ngiga tudah Tuba maya hari siti aja. Sehari nya sida ngereja pengawa nitihka udah diatur malam tadi. Sepemanjai hari sida begigaka bangkai tudah Tuba ke lemas tang nadai mega temu.

Meda nadai temu sehari udah nya sida serumah lalu nganjung Apai Janggung. Sekeda ke bukai lalu nampung ngiga bangkai Tuba. Sida lalu mai piring lalu miring ba kerangan Adai ngichaka Tuba ulih ditemu sida sehari nya. Empai lama udah datai ari pendam, sida ke ngiga Tuba pan datai mega mai bangkai iya.

Sida serumah lalu berengkah mega kiruh baru. Udah ga buntau sereta lelak ngelama apai Janggung ke sakit tambah ga agi ngintu pemati apai Janggung enggau Tuba.

Ini Endu chukup tusah ati. Leka sabak iya chukup sinu didinga. Pia ke tusah ati ditinggalka laki, pia mega iya ngutuk menantu iya ngumbai menantu iya mai sial ngagai bilik sida. Indai Endu tetap begatak lebuh ke ninga sebana leka sabak entua iya.

Laban nitihka laki sereta sinu ngagai bala anak iya tetap enda pedulika jaku orang mayuh. Sida serumah ngintu pemati Tuba semina semalam aja lalu ulit seduai pan sama dua minggu.

Maya ngetas ulit nyau semak, Janggung enggau Empangup nurun ke pasar Julau meli barang dikena ngetas ulit. Tudah Janggung baka ke ngambi pemedis lebuh datai di pasar laban enda mukai-mukai tudah tuai tak kena lantak motosikal. Nama dih penyadi tudah Janggung nyau patah kaki enggau jari.

”Jedun tu ke mai sial ngagai kitai sebilik tu,” ku ini Endu mutap kediri baru.

’Ya nama baka nya dihh indai? Anang bangat jaku munyi nya mih indai,” ku Unggan nyau lembau ninga putap indai iya. Udah leju udah bansu tudah apai Endu. Nadai nemu chara agi deka madahka indai iya.

”Nadai guna kita menyanak tu, uji lari kita ngambika kami badu tusah. Udah siku, siku ga agi kena tusah tambah mega ukai orang bukai.”

Indai Endu enggau apai Endu badu memunyi. Malam nya indai Endu nanyaka runding Apai Endu. Seduai sama setuju belelang ngidupka diri enggau bala anak.

Pagi nya tumu apai Endu madahka penunga diri ngagai indai iya. Indai iya nadai mayuh jaku, semina bepesan ngasuh nyaga bala uchu iya enggau manah. Dalam ati sigi nya mih utai disampi iya.

Sebedau mupuk Unggan bepesan ngasuh indai iya nyaga diri enggau manah lalu enti sakit anang enda berubat. 

“Kami menyanak mindah dulu laban kitai enda ulih begulai. Enti asai nuan agi beguna kami indai tau mega nuan mesanka kami pulai laban kami menyanak sigi enda muai nuan, indai. Pia mega indai, nuan anang kereja berat, enti udah bulih belanja ila aku ngirum ke nuan,” ku Unggan enggau ati ti chukup tusah laban ke enggai beserara enggau indai iya.

”Anang ngira aku, mati mati ga. Penusah enggau penyuntuk aku, aku empu ke nanggung,” ku indai iya enggau nyawa ti kasar.

”Anang munyi nya indai, kami enda baka ke enggai begulai enggau nuan tang nuan ke muru kami, kati ku enggau.”

”Lari mih kita,” ku ini Endu ngerudas. Iya lalu angkat meri manuk makai.

Sebedau mupuk Unggan mega madahka pejalai sereta nerangka utai ti nyadi ngagai tuai rumah sida. Bala anak iya sama bela enggai enggau magang.

Puas indai sida ngumbuk baru sida setuju. Bila udah nemu penunga, sida Endu menyadi lalu nitihka ini sida engkani manuk.

Sida sama merap ini sida sambil nyabak sikuk-sikuk madahka diri enggai ninggalka ini sida kediri. Sida menyadi sama ngumbuk ini mai iya enggau sida mindah, tang seleka jaku pan ini sida enda nyaut. Nya ti ngasuh sida bendar agi nyabak rauh-rauh.

Apai sida ngangau lalu mai sida mupuk. Enggau ati ti chukup tusah sida menyanak ngejangka pendai lalu basampi minta tulung Tuhan ngambika bulih pengelantang enggau penyenang.

Datai di pasar Julau, sida menyanak ngagai menyadi iya Laja. Unggan mega becheritaka pejalai sereta utai ti nyadi ngagai menyadi iya. Lemai nya Unggan minta anjung Laja ke Sibau Pasar Maling ngejung sida serumah ke ngaga rumah ba Jalai Tongsang.

Bala anak dianjung iya besekula. Seduai iya melaki bini sama kereja enggau orang ngaga rumah. Sebulan nandan di langit, setaun nampun di bukit, semua penusah, penyuntuk, pemedis enggau penyenang udah di asai magang. Kadang-kadang kerja sampai jauh malam ngambi gawa lebih maya.

Unggan pan berunding ngiga chara bukai. Iya pan belajar neriba kerita. Udah bulih lisin, Unggan lalu meli van second hand ke udah dikena orang lima taun. Abis kereja lemai seduai bini iya bejual barang runchit ke rumah-rumah orang.

Enda berasai udah lima taun Unggan ngejangka rumah lalu nadai pulai. Berita orang ba rumah semina nemu ari ke betelefon enggau Laja aja.

Mayuh amat pemansang ba rumah sida. Ke manah iya rumah sida udah datai jalai raya. Ninting hari iya ngereja utai ti sama, nadai ngira pengelelak enggau pemedis.

Labanka anak orang merinsa Unggan enggau bini iya chukup pandai bebelanja. Seduai mega enda besai belanja, kengka duit disimpan memagang ba Bank Simpanan Nasional.

Van ke lama nya pan udah abis dibayar. Meda baka nya, Unggan lalu berunding deka meli van baru ti besai agi. Van ke lama dikena bini iya nganjung bala anak seduai sekula. Lalu van ke baru nya deka dikena bejual barang runchit ke rumah-rumah orang. Pengawa bejual seduai mujur amat. Unggan lalu berunding deka bejual ngagai menua sida tang bini iya enda setuju.

Unggan lalu madah manah-manah ngagai bini iya. Kitai bejual anang ngira jaku orang lalu peluang bisi sereta tua ulih maju. Jaku orang anang ngira ukai ngasuh tua kaya lalu orang ukai idup enggau tua.

”Enti baka nya pulai ke rumah aja mih kitai, sinu meda indai kediri agi ga udah tuai,” ku indai Endu.

”Amaaat…! Nuan?” ku apai Endu takanyat, tegepang tekenyit ati ninga jaku indai Endu.

”Bah kati ku bula dih.”

”Kati bala anak benung alang-alang sekula?”

”Din pan bisi sekula.”

”Enti nuan setuju, aku nadai nanggur laban nya sigi bilik lalu indai aku,” ku saut laki iya.

Maya pemesi sekula seduai nguji nemuai ke menua tang enda ga nyadi labanka agi malu dikumbai orang sial.

Seduai nguji bejual maya ari minggu ba pasar Julau. Mayuh bala kaban di Julau ke meli barang seduai. Sekeda nanya lalu ngarapka seduai pulai ke menua. Pia mih ku seduai, enti bisi nasit.

Meda gaya di Julau pengawa bejual seduai mujur, Unggan nadai belampung ati deka mulaika diri tambah mega udah bisi lampu gadung ari bini iya. Pemulai sida enggau ati ti berat sereta malu laban nangika indai enggau sida serumah agi mengkang enda ulih nerima sida menyanak.

Datai di rumah din, Janggung mih orang keterubah nabi sida menyanak lalu minta ampun madahka sida menyanak nya enda besalah.

”Aya, pemati apai aku laban penyakit tungkul atau lalu aki mati ketegal perau karam. Aku empu ke esiden ketegal aku ke enda bejimat-jimat maya ngelayang jalai. Semua nya ukai salah Indai Endu sereta ukai kena utai orang tang sigi udah atur Petara.” Janggung enggau nyawa ti nesal minta ampun amat-amat. Iya lalu nyerugang ba mua apai enggau indai Endu.

”Enda alah kira nya jang, utai ke udah udah mih kitai ngepunka pengidup baru ga. Arapka nuan gerai lalu kitai sama-sama mujur dalam pengidup. Sama-sama mih kitai ngampunka pangan diri sereta Petara ngampunka penyalah kitai.” Unggan bejaku penuh semangat.

Indai Unggan datai enggau sabak-sabak gaga lalu merap bala uchu sereta menantu iya..

(Diambibali sereta diseruri ari jerpan Thomas Nuah, Pengaruh)