Chebur Mulut

Udah tujuh kali hari diletak alai bebai nginti undang ke ulu Sungai Serawak ke beberita mayuh undang besepit biru ditagai ketegal mayuh hal ti enda ulih diseliah. Sekeda nya ketegal bisi rabing. Nya ke ngasuh raban ke regas begiga sereta enggau orang berikan ke nyala undang lalu iya ke ngetan bubu diansak ngubah runding lebuh ke deka bejalai begiga. Taun tu udah dua iku orang berikan nyadi dengah aki ke semampai nganti sida ke puni.

Agi tekial-kial dalam runding ngenangka siku lelaki benama Bujang Amit tak nadai temu penunga maya iya benung nyala. Sida ke semenua enggau Bujang nadai enda nemu iya tu orang ke bidik begiga. Nadai kala pulai lebu lebuh nurun begiga. Bisi aja ke empa sida sebilik, ni ke dijual pan bisi. Kenu ku orang ke semak ba menua dia madahka tudah tuai ditagum jagu. Kenyau ari sehari nya sida ke diau nguan menua nya berasai bendar rawan nyau asai ke diau ba baruh punggu. Bala ke seruran nurun nginti sereta orang berikan tradisional berasai bendar diruga jelu ai tu.

Tang berita nya nadai matahka semengat lima iku bakih. Sehari nya sida enggau siku ke empu perau mutus ati deka majak ke aktiviti nginti undang ba genturung menua ke dikumbai Gita Lawai.

Baka ke udah dilanggur. Pagi Hari Enam udah tekerebak tawas, sebuah perau umbas iya pemesai disempulang enggau injin sepit 25 kuasa kuda  udah angkun nganti penatai sida empat nya ba tebing sungai.

Perau nya baru dua taun udah dikena, mai Liman enggau empat iku bakih iya ke benama Kilat, Salang, Jilan enggau Amat. Liman taja pan mit pendiau nyadi pengulu sida laban ke teleba begiga kenyau ari mit enda milih ke babas tauka ba sungai. Sungai abis dipansai, lubuk abis dikauk. Genap ujung minggu pama nadai pengawa ti meruan iya sigi nadai di rumah. Nurun begiga. Pulai sigi bisi aja ikan tauka jelu dibai.

Pagi nya sida mudik nanga Sungai Paroh iya nya ulu Sungai Serawak. Sida bekejang ari pengkalan ba genturung menua Gita Lawai nya kiraka tumu pagi urung jam 8 pagi. Kenu ku orang ke empu perau maya nya endang maya ti chukup engkeman alai sida mupuk. Hari sehari nya pan manah. Gentilang remang di langit ngenjing bebiru baka bichu.

Nyau kepuas-puas ke mudik sungai nya kira sejam lebih sida sebuat lalu berunding deka enchuba nasit  ba sebuah lubuk ti keterubah. Lubuk nya enda jauh ari pun pedada ti pengabis besai ba tebing sungai nya. Ke bendar nya ukai endur ke deka dituju sida sebuat. Agi jauh ke ulu kin. Tang meda lubuk nya manah amai tentu mayuh undang dia pia ku runding sida sebuat. Sapa agi enti ukai Liman empu tuduh penemu.

Sida lalu ngetu dia. Nama agi, sida sebuat lalu mantaika umpan belut mirah chechirak enggau anak undang. Semua sida sama bebaika umpan kediri empu. Tusah ga enti bekunsi. Udah umpan diadu nama mih agi dianti lalu berengkah mih sida sebuat.

Salang ke pengabis jampat teulihka siku undang ti numbas iya pemesai sereta ditangkanka Amat. Nyangka nasit Salang sehari nya bisi manah mimit baka langkah kanan.

Dalam awak 40 minit, sida sebuat sebuat mujur bulih 50 iku undang galah sepit biru. Naka pengaga balat sida sebuat. Semina siku ari sida ke bedau benasit manah. Iya ke  bulih nya mihmeransang semengat sida deka majakka pengawa sida sehari nya.

Ari lubuk keterubah, Liman lalu mai sida sebuat mindah ngagai lubuk kedua semak pun kayu bintangur kuning. Maya nya ninga Kilat tak kutap-kutap muchau kediri laban lalu bedau bulih undang ari tadi. Bala bakih iya ke bukai semua udah bulih, abis kurang pan lima iku. Bisi ga dibai pulai enti Liman tak madah chukup alai endur sida mutarka diri.

“Kini enda semua undang tu?” Lapa mih kita enda makai ginti aku. Naka kediatu lalu nadai bulih. Indah batang tubuh baya pan nadai ga dipeda ayan,” pun ku putap Kilat.

“Apuuu... mulut nuan, tak nadai insuran! Ni nuan tau bejaku munyi nya. Uji nuan diau jenuh?!” pia ku perak Liman. Sigi munyi orang ke udah ringat tudah Liman. Ngelama ke udah ngemeranka pengawa tu nadai udah Liman tetemuka orang bejaku munyi Kilat tu.

“Eis! Kapa aku takut. Maya aku gawa nyadi askar munya, lebuh operasi di Perak enggau Kuantan suah ga betemu enggau rimau sereta gajah, semua jelu tu rari pama meda aku,” timbal Kilat.

“Anang munyi nya kitai, Lat. Mali amat jaku munyi di kampung,” pia ku lalau Liman.

“Chis... nadai agi orang pechayaka utai baka nya kemaya hari tu, Man. Dunya udah jauh moden. Munya nyangka kini. Agi mayuh antu.”

Agi deka mutap tudah Kilat tang enda mukai-mukai perau ke ditepan sida nyau linggar laban lelangan. Tak berebeni besai lelangan nya dipeda sida sebuat. Nya ngelaika bisi utai deka pansut ari dalam sungai nya. Enda lama udah nya sida pan tesiumka bau ke balat rengut. Ribut bepuput lundai baka lemambang ke benung nyadaka genteran leka main.

“Akai dai kita tu! Nya mih ku orang tuai, udah madah ari tadi jaga penti pemali. Anang bejaku besai. Peda!” pia ku Dinil, orang ke empu perau ke dikena sida sebuat bejaku nganu sida sebuat. Maya nya nadai siku berani nimbal jaku Dinil. Nyau baka manuk mabuk sangkar tudah Dinil tu nganu Kilat. Dinil tu sigi siku orang ke tegap pendiau enggau runding. Iya gawa nyadi pengajar ba SMK Biem, Segatok tang ngembuanka pengerindu ti sama enggau sida Liman.

Tak ngetu mih bala sida sebuat baka puyu mabuk keruh, tegenung baka empelekung mabuk ambuk nadai nemu utai deka digaga. Tebelengga lilih bala sida sebuat. Baka kilat peda ada ayan aki ari dalam ai.

Sida sebuat sama bela tekanyat meda aki tuai tak segenda ayan semina semeter aja ari perau sida. Apu! Pemesai tubuh aki nya diperatika sida nyau deka sama pemesai enggau perau ke ditepan sida nya.  Semua sida ke benung nginti undang nya berasai panik. Semina Dinil aja ke enda. Iya lalu ngeredungkan angkat bediri. Peda mulut iya tak kimut-kimut baka ke bisi utai disebut tang nadai mega didinga leka. Puas ke kimut-kimut mulut dinga ...  

“Kami ukai deka ngachau sereta ngambi semua undang dek ‘aki’.  Kami semina minta mimit undang ke enda diempa ‘aki’, ungkup bai kami pulai, diempa kami sebilik.

“Kami minta ampun suh dek aki,” pia ku jaku umbuk Dinil, jaku iya chukup ngemaruhka diri. Jaku iya penuh basa sereta manah didinga.

Kira-kira 15 sikin udah nya jagu ke mesai perau sereta bechura kelabu enggau burak  ba tengah belakang mupuk beseranyat tengelam belubah-lubah.

“Kur semengat kitai nadai apa nama. Aram pulai kitai,” pia ku Dinil mai sida sebuat nya mupuk.