Dikeduan ketegal lungau

Kami duai lalu bejalai baru ari alai nya. Sungai diulu, sungai diili, bukit diturun, bukit ditiki. Nyau kepuas ke bejalai, dia kami duai tedingaka utai merengung. Malik ke kiba, malik ke kanan. Peda kami duai tak tansang gamang. Aku laban ke enda jugau, angkat lalu nampal lubang gamang nya ngena daun pingan.

Udah nya kami duai lalu sama duduk ngibun tansang gamang. Rindu bendar ninga indu gamang ti merengung dalam sarang nya.

“Sambi,” pia ku aku.

“Au, ah, nyau lale asai ninga, nyau deka tinduk asai mata, asai ti ditimang sida niang indai ti ngua kitai agi mit menya,” pia ku Tekura nyaut aku.

Nyau kebangai utai kami duai ti duduk nunga sarang gamang nya, alai lalu mansa Nyumbuh.

“Oi, nama pengawa seduai dia dih Sambi,” ku Nyumbuh nyapa kami duai.

“Eh kami duai Sambi tu diinjau sereta diasuh Raja ngibun Bebana Raja ti ditinggal iya ditu, enggaika bisi orang ngachau. Nya kebuah Raja ngasuh kami duai Sambi nguan iya ditu. Raja udah bejalai kin,” pia ku aku nimbal jaku Nyumbuh.

“Ni Bebana Raja ti diibun seduai dih Sambi?” pia ku Nyumbuh nanya.

“Nya iya Sambi, tang nuan anang negu iya enggaika dianu Raja. Uji pending nuan munyi iya!”

Lalu singitka Nyumbuh pending tunga ngagai tansang gamang, dinga iya merengung sereta berangangung utai dalam nyin.

“Apu neh, amat manah bendar munyi bebana nya  Sambi. Uji aku nempap bebana Raja nya sambi.”

“Uh, enda tau. Kami duai ti nguan iya dih enda diasuh Raja negu, anang ke deka nempap  iya. Anang! Enggaika dianu Raja,” pia ku aku nangkan Nyumbuh.

“Aku dai, keran bendar ati tu deka nebah bebana Raja nya Sambi. Utai enda kala didinga, sekali nempap pan pama mih Sambi,” pia ku pinta Nyumbuh.

“Ti nuan bengat keran deka nebah iya, ila mih kami duai Sambi tu nanya ngagai Raja, tang iku nuan tanchangka ba kayu tu enggaika nuan rari. Bebadi ngapa kenduai Sambi tu dianu Raja.”

“Barang ku nuan mih Sambi. Tanchang ku nuan, tanchang ga mih, ikat ku nuan, ikat mih. Asal mih aku ulih bemain nebah bebana Raja nya,” pia ku Nyumbuh setuju enggau penemu aku nya tadi. Deka pan enda laban ke gagit deka nebah bebana raja nya.

Udah tembu tanchang iku nyumbuh ba anak kayu, kami duai Tekura lalu mupuk nanya ngagai Raja, kenu ku kami duai madah ngagai iya.

“Pama kami duai madah tau, baru nuan tau nempap iya. Enti kami duai madah anang, anang mega nuan nebah enggaika kitai dianu Raja,” pia ku aku meri jaku lalau seleka dua ngagai Unggal Nyumbuh.

“Au, pia mih Sambi. Jampatka seduai nanya ngagai Raja, beguaika aku bemain ngena bebana iya nya,” pia ku Nyumbuh ngingatka kami duai.

“Auuu...unggal,” ku aku nyaut.

Udah nya kami duai Tekura lalu nyau beguai-guai. Iya pan pemanah kangau, aku lalu ngangau madah, “Tau Sambi, tau ku Raja, tebah mih dia, kala Raja nyagi.”

Ninga kangau aku madah tau, Nyumbuh lalu beguai-guai nempap tansang gamang. Tempap kiba, tempap kanan. Nama agi, lalu pechah sarang gamang sereta lalu malut sereta nyengat tudah nyumbuh. Iya nyau nyerauh-rauh, merijat kin kitu, laban iku iya ti udah ditanchang ba kayu. Nya alai lebuh iya engkasak, dia dih iku Nyumbuh lalu putus. Beduduk ari tu mih iku Nyumbuh nadai dipeda agi, laban tuai sida kelia udah putus iku bai engkasak ngerijat rarika indu gamang sesarang.

Parai aku tu diayahka Pelanduk seduai Tekura. Ila mih seduai deka ensepi asai, pia ku chakap Nyumbuh. Tansang gamang ti dipadah seduai bebana Raja. Lagi asai seduai, mensa seduai nya, ku munyi chakap Nyumbah nya dalam ati iya din.

Nyumbuh lalu mupuk bejalai nyidi tunga jalai kami duai Tekura ti udah rari. Tekura ukai nya laju, tak mina ringkap-ringkap, rayap-rayap. Lama agi semak agi mega munyi Nyumbuh ti bechakap nitihka kami duai. Nyau majak mega Nyumbuh nya nyebut, “… ensepi asai, lagi asai seduai, ila mih seduai ensepi aku malas.”

“Bah Sambi, kati ku aku tu? Parai aku tu ila jamah nyumbuh. Nya iya nyau udah semak sesemak,” ku Tekura.

“Kitu nuan,” ku aku. Nama dih aku lalu nibar Tekura ngagai lubang kebung. Nama agi nyau lelakak tudah Tekura dalam lubang kebung.

Udah nya, aku lalu nyau ngebuka diri rari belalaika Nyumbuh.

Enda lama udah nya Nyumbuh pan datai ba lubang kebung ti alai Tekura. Nya Tekura ti udah beduan ngayahka aku, pia ku sapa Nyumbuh.

“Nuan nya Sambi Nyumbuh,” pia ku sapa Tekura ari dalam lubang kebung.

“Ya aku mih tu Nyumbuh ti udah diayahka seduai Pelanduk.”

“Endai, nadai aku tu bisi ngayahka orang, nadai ngayah nuan. Peda nuan aku empu tu nyau deka parai labuh ke lubang kebung tu. Enda tau pansut, enda tau pulai nadai jalai. Peda nuan aku tu nyau kurus, nadai makai, nadai ngirup, nyau deka parai mih aku tu. Enti nuan kasih, ambi mih aku tu Sambi,” pia ku sapa Tekura ari lubang kebung. Nyau enggau sabak-sabak Tekura minta ambi Nyumbuh ari lubang kebung.

“Aku tu udah diayahka Pelanduk seduai Tekura, nya alai aku tu deka bebalas. Keba Pelanduk deka aku peruk, Tekura deka aku empa,” ku Nyumbuh nyakap.

“Oh anang sebarang balas ga nuan Sambi, kami Tekura tu mayuh bansa. Dinga nuan, kami bisi tekura tambit, tekura ai, tekura jaung, tekura umang, bisi tekura pudu. Pelanduk pan mayuh bansa baka pelanduk tampin, pelanduk sawal, pelanduk kemayang panas. Dini nuan tau sebarang balas. Sida ke ngayah nuan nya sigi Tekura ti jai, Pelanduk ti jai ngayahka nuan. Enti tudah aku tu diupah, digaji orang ngayahka nuan pan enggai mih. Ukai bisi ngasuh kaya nya. Seharitu tua ngayahka pangan, pagila lusa tua betemu baru, nama asai. Endaka malu,” pia ku Tekura.

“Ba tua ti manah tu, pia mih iya Sambi, tang ba orang ti jai, aku ti agi balat bendar pedis tubuh laban sengat gamang. Iku aku nyau abis putus bai aku ti merijat rari, laban ti diikat ba kayu.”

Udah nya Nyumbuh lalu nilik ngagai tunga Tekura ti bedau lakak-lakak dalam lubang kebung. Peda iya nyau ngeruang dada Tekura.

“Apu, amat ga Sambi, kasih mega aku meda nuan nyau kurus keringke.”

Ketegal pengasih Nyumbuh lalu ngambi Tekura ari dalam lubang kebung nya.

“Kati tadi bisi meda orang mansa nuan ditu Sambi?”

“Au bisi, mih tadi orang tubuh dua, lalu dikangau aku minta sah, nyampau mih deka ngetu ngesah aku, malik dih enda. Baka ti enda ninga.”

“Tentu seduai iya nya ti udah ngayahka aku,” pia ku Nyumbuh.

Tekura lalu madah nyangka amat seduai nya. Lebuh ditanya kini penunga iya lalu beguai nunjuk tunga ke bukai.

Nyumbuh lalu madah diri mupuk nyidi tunga seduai nya tadi ngajar Tekura ngasuh bejimat enggaika labuh ngagai lubang kebung baru.

Tekura lalu nyapa madah enti bisi betemu enggau seduai nya, lalu ngasuh Nyumbuh nginsah seduai nya enggau penapat inat. Ati iya din udu amat ketawaka pemeli Nyumbuh ti nulung iya pansut lalu nadai nyangka iya mih ke udah ngayah Nyumbuh nya.

Udah Nyumbuh mupuk Tekura lalu nengkadah ke langit. Nyin langit, tu tanah, nya babas ku ati iya din. Agi panjai mih umur tu. Iya lalu rising-rising ketawaka diri ti udah ngayah Nyumbuh. Enda lama udah nya, peda junuk-junuk Pelanduk datai ngagai Tekura kia. Iya lalu nyapa Tekura nanya, “Nadai apa-apa nuan Sambi?”

“Nadai Sambi, suman baka selama.”

“Baik mih nya.” Kami duai lalu sama ketawa rakah-rakah ngenang diri ti udah beduan ngayahka Nyumbuh. Nya mih nyadi pama kitai lungau.