Jeti

Tu sebuah jerita ngenang Jeti enggau indai. Jeti seduai indai iya tu orang ke seranta. Seduai belangkau semak orang ba sebuah genturung pendiau ke benama  Taman Paya Rebuh. Seduai iya sigi enda betampung enggau orang tang diau kediri belangkau nenggali.

Nama hari panas, orang ba genturung pendiau dia suah begigaka ikan ba sungai ke enda jauh ari taman nya. Mansai mih orang nya. Nyadi seduai iya enggau tang semampai enda teulihka ikan. Kebuah pia laban Jeti suah alah laban orang lebuh maya begiga ikan. Laban empa pemayuh ikan, seduai iya teulih ga ikan ke empa sekali dua. Ikan nya mih entara lauk seduai kelimpah ari engkayu bukai baka paku kubuk.

Ensepi diri ke nadai bulih, nyanda ikan ngagai orang bukai indai iya. Dijali orang ikan ga seduai iya.

“Pama kami duai bulih ila baru mayar kita, “ pia ku jaku indai Jeti. Jali orang ikan, jali orang salai enggau pekasam  mih seduai iya. Mansai ga seduai menyanak, begigaka ikan dikena bebayar tang lalu enda teulihka ikan dikena malas ikan, salai enggau pekasam ke udah dijali orang ngagai seduai.

Enda lama udah nya hari pan berunggu ujan. Nadai mih seduai menyanak ulih begiga dikena mayar ikan ke udah disanda seduai. Seduai menyanak pan nadai ga nemu chara bukai agi dikena ngulihka ikan.

Nyau ke lama udah nya, orang ke endur seduai nyanda ikan pan nyau nagih seduai. Seduai meindai pan nadai ga nemu chara dikena mayar utai nya laban hari selalu amai ujan. Tang nasit seduai mujur amai. Dia bisi sekali, seduai iya lalu diambi orang gawa ba estet ngaga rumah ke enda tentu jauh ari Taman Paya Rebuh.

Jeti tu diasuh tuan kontraktor nya ngibun langkau sereta rumah ke benung digaga. Iya lalu diau ba langkau ke digaga alai bala kuli diau. Tudah Jeti tu apin tentu besai. Indai iya enggau bala kuli bukai begagaka rumah.

Nya mih tadi maya ke nyaga langkau kadang-kadang tak nadai dianjung orang bekal tudah tuai. Merinsa amai mih iya laban suah enda makai. Lapar. Dua-tiga hari sekali ga orang nganjung pemakai ke tudah tuai. Nyabak mih tudah Jeti, rauh-rauh madahka pemerinsa diri. Serebana kediri ke diambi orang nadai begaji.

Nyau kepuas seduai iya ngetat sereta serebana ke pemerinsa diri, seninjik bendar orang siku mansa menua benung meda rumah ke digaga laban bisi ati deka meli rumah dia. Ninga bisi nyawa orang nyabak, dia lalu nurun ari kerita iya.

“Sapa mih orang ke nyabak nya,” pia ku Uchak Salang bejaku kediri berandau nenggali. Iya lalu bejalai ngagai tunga langkau nya ngiga tunga munyi sabak orang ke didinga iya. Iya lalu tepedaka Jeti.

“ Nuan ke nyabak nya jang?” pia ku Uchak.

“ Ya, aku mih nyabak tu,” pia ku Jeti.

“ Nama utai ke disabakka nuan dih?”

“ Dini aku enda nyabak, merinsa bendar kami duai indai aku tu, diambi orang ke gawa ditu nadai begaji,” ku Jeti.

“Pia. Nama kebuah orang ngambi seduai gawa ditu nadai begaji dih?’ pia ku Uchak Salang.

“Nya mih, kami duai nyanda salai, nyanda pekasam ari orang tang enda ulih bayar kami duai ga laban hari ke selalu ujan. Nya alai kami duai diambi orang ke nangkap kontrak ngaga rumah ditu diasuh sida ngibun langkau enggau rumah ke benung digaga ditu,” pia ku Jeti.

“Enti pia, anang nuan agi ngibun rumah ditu. Pulai enggau aku nuan,” pia ku Uchak.

“Enggai aku dibai nuan pulai dih, lagi dianu orang aku,” pia ku Jetie.

“Nadai orang nganu dih, pulai enggau aku mih nuan,” pia ku Uchak. Uchak nya pan lalu mai Jeti pulai ke rumah sida.

Bekerita mih seduai. Enda lama udah nya seduai datai ba rumah sida Uchak Salang Taman Paya Rangkai. Alit ati mih bini enggau bala anak iya meda iya mai anak mit pulai. Uchak Salang lalu madah ngagai bini iya pekara ti nyadi.

“Nya alai baka tu ga nya Jeti. Aku enda mai nuan lama nemuai kitu laban sinu ke indai nuan diperinsa orang din. Bayar salai orang nya ulih seduai. Ukai nya nadai salai ditu dikena mayar salai nya deh. Pagila Lee Bis, deriba aku nganjung nuan, mai salai kena mayar ke udah disanda seduai indai nuan, “ ku jaku Uchak Salang.

Nya, udah nya, nadai mih orang ke nganjung bekal ngagai Jeti ba langkau. “Nadai dia Jetie. Nyangka iya udah mati. Rari kini Jetie,” pia ku jaku sida kuli kontraktor. Nyabak mih tudah indai iya, ninga Jeti tu nadai temu tunga lebuh ke pulai gawa.

Lima hari udah nya, baru orang di Pasar Libau nganjung Jeti pulai. Anjung orang iya lalu dibekal sida enggau pengaruh gembar tubuh. “Nya alai tu ubat Jetie. Bai nuan pulai. Nuan ila enda merinsa agi, semua utai ulih nuan magang, “ ku jaku sida bini Uchak Salang.

“Laban nuan udah diambi kereja nadai begaji, kami besampi ngagai Petara ngambika nuan kaya raja ila,” kenu ku orang nya ngagai iya.

“Nya alai kami tu ngasuh deriba kami Lee Bis nganjung nuan, ngambika bisi mai salai ke nuan,” ku jaku Uchak Salang enggau bini iya.

Orang mayuh dia ba Taman Paya Rangkai pan lalu sama-sama nganjung Jeti ngagai kerita. Mupuk mih seduai udah nya. Datai ba endur ke alai orang ngaga rumah sereta langkau dia Lee Bis lalu bejaku. “Kami semina ulih nganjung nuan naka  tu aja. Ma salai nuan ngagai langkau “ pia ku Lee Bis.

“Nadai aku temaka salai nya,”ku Jeti.

“Ulih,” pia ku Lee Bis.

Laban ke enggai bekelikuh, udah nya lalu dima Jetie mih ma salai nya. Ulih mih semua salai nya dima iya. Datai di langkau iya lalu ngagai sida ke udah nyali iya salai. Begau orang meda pemayuh salai dibai Jeti.

“Nama main nuan nadai kemari dih?” pia ku orang nanya Jeti.

“Ngiga salai aku. Nyau puas diperinsa kita. Nyadi tu dikena mayar salai kita,”pia ku Jeti. Salai nya tadi lalu dikena iya mayar semua salai ke udah disanda seduai meindai ngelama tu. Nama agi dih, gaga mih semua orang. Indai iya pan gaga.

Berengkah ari nya, Jeti majak besai-sebesai lalu datai maya alai iya patut besekula. Taja pan iya besekula semina naka pom lima, Jeti tu sigi orang ke bagas. Iya lalu begigaka pengawa udah iya tembu pom lima. Jeti pan lalu gaga laban bisi sebuah kompeni ngaga rumah ke baru enda jauh ari seduai meindai dia. Iya lalu minta gawa dia.  

Kepuas ke gawa dia laban ke manah ulah sereta rajin iya lalu ditiki orang pangkat. Ari kuli iya nyadi mandur lalu kepenudi nya iya lalu ditiki pangkat nyadi menija. Sida kontraktor ke ngambi seduai ke gawa suba nyau bengkrap lalu merinsa ari seduai menyanak. Lantang mih pendiau seduai udah ke gawa ba kompeni ke baru nya.

“Nya alai kitai, enti orang jai enda tau kelalu sepeneka ati kitai enggau, enda tau kelalu diperintah laban Petara endang bisi ngemataka kitai,” pia ku Jeti ngelalau bala kuli iya.