YB Timoti Juau

“Orang baka ni ke deka sida tu? Pahal enggau aku?” Ku Timoti Juau mantaika serebana ati iya. “Aku ukai kala makai suap, nadai kala ngena duit sapa-sapa. Sesen pan nadai kala. Nama kebuah sida tak milih orang bukai?”

Bala ke ngirup ba kedai kupi nya nyau chapuh ketawa munyi seraban burung ke makai buah kara. Mayuh utai ke ngasuh bala sida chapuh. Macham-macham pekara ti dikerandauka sida lebuh betemu enggau pangan diri.

Menua sida dia majak pegari sepengudah diberi nama baru. Diatu iya dikumbai Genturung Pendiau Manipesto tang suah agi disebut Kampung Manipesto nitihka jaku kemaya hari tu. Kampung  nya diatu nyau diuan bala anak mensia ukai jelu siga agi. Menya maya agi kampung puang sigi diuan bala jelu.  Kenyau ari tumbuh utai, nama menua sida nya dikumbai Emperan Ratai tang nama Manipesto nya tebilang agi kenyau ari tumbuh sebuah gerempung parti politik ti dikumbai Parti Riris Bansa. Kenyau ari nya sida ba menua nya berebut-rebut enggau orang ngeruhka ai, bepasangka papan manifesto ba genap sukut genturung pendiau sida. Macham-macham tukuh papan manifesto digaga sida. Bisi nya segi empat. Bisi nya segi empat panjai. Bisi mega kepih, bisi mega segala ina nitihka kreativiti diri empu. Papan nya enda kala dibuai, tang diganti enti iya udah lama sereta dipeda luya.

Sida ba menua nya berengkah idup lantang sepengudah bisi industri baru iya nya industri ngaga papan manifesto. Semua gerempung parti politik sanggup mayar duit upah ngaga papan manifesto. Lalu digaga mih papan manifesto ti manah-manah. Enda kira ari ni penatai parti nya sekalika parti perintah tauka parti penyakal. Orang menua nya udah amat-amat ngemeranka prinsip demokrasi iya nya meri peluang pukul rata ngagai semua sida asal sida bulih upah ti chukup. Tang taja pia, bisi siti parti ti tebilang ke ngasuh ngaga mayuh papan manifesto laban sida tu enda luki sereta sanggup mayar gaji orang ke ngaga papan mafesto nya besai.

Ba sebuah sukut ke jauh ba ujung kampung ti jauh ari jenguk bala orang sereta rapas dipeda mata dia mih alai YB Timoti Juau niri negika manifesto enggi iya empu. Udah berumur tiga puluh lima taun, udah luya tang lalu bedau mega diganti laban nadai siku orang deka ngaga kereja enda bepampas. Kereja enda begaji. Volunteerism ku jaku orang kemaya hari tu. Taja pia, sapa-sapa orang ke tesat lalu rembus ke sukut berantu nya agi ulih sereta sempat macha manifesto YB Timoti Juau ti ditulis iya ngena urup Dunging ke dikira tulis Iban original kelia munya, ditulis dalam baris ayat pandak aja. Ku munyi tulis nya, “Pilih mih Timoti Juau. Pengari Ngatika Diri Ti Lurus Ti Enda Nguna Duit”.

“Baru lima kali alah, udah leju, pia? Enda patut?” ku siku orang ke enggau iya berandau ke benama Lam Ng Kong, bansa Chiban ke nyaruk menua sida dia laban apai iya ke muka kedai renchit di menua nya lalu betampil enggau sida dia. “Ni nuan ke ngumbai diri bujang berani dih Timoti?” ku Lam Ng Kong nya nampung jaku iya empu.

“Kichiwa sereta pedis ati aku tu. Nama aku tu orang jai pia?  Kala ngelakar orang aku tu pia?  Bisi makai suapka?” tanggi Timbo amat-amat. “Kati aku tau bulih tujuh iti undi aja? Sapa ti manchal nya meri aku tujuh iti undi aja? Nya nyau baka lumur Petara penyampau undi aku jamah kita. Enti nitih penyampau undi ulih aku ari musin siti ngagai musin siti sigi patut ngerebesan baka padi dalam tibang. Dulu suba bulih ga bepuluh undi, tu nyau majak nurun-senurun. Nama reti nya? Kita tu semua ulih dibeli, enda baka suba. Enda patut-patut. Suba kita lurus, undi enda ulih dijual beli. Diatu kita ke nyual undi. Nyau nemu bejualka undi. Kati kita ingat pengawa kita nya selamat pia? Di dunya tu amat mih kita selamat. Kati enti di Batang Mandai din dih?”

“Ah, nya salah nuan empu nya  Yak Timo. Nuan ke makai suap,” pia ku siku agi raban dia ke enggau berandau nundi sereta nguji ngeruga runding iya.

Tak tuchum tudah Timoti Juau ninga jaku Ilan nya, tang tuchum iya tak baka orang ke ngulum gendum pinang.

“Pama baka nya, kita semua tu mih ke makai suap,” tanggi Timoti baru.

“Sigi amat, kitai tu semua mih ke makai suap. Aku bulih seratus aja. Nuan dih, berapa ulih nuan, jang?” tanya siku orang ke enggai nama iya dikelala.

“Nya resia nya wai. Ni tau padah. Undi ga resia. Makai pan resia,” timbal iya ke bukai sama mega enggai dikelala nama. Iya pan lalu ketawa. Sida bukai pan sama-sama bela ketawa rakah-rakah nangkan iya ke dulu ketawa nya.

“Nyadi kita tu semua makai suaplah!” pia ku Timoti Juau nyau munyi orang ke merak, penginggar jaku iya.

“Ukai pia,” ku Pita Alak, ga lalu ditangkan enggau ketawa bebala mayuh. Enda apus ayat Pita Alak. Ukai baru nemu tudah tuai. Enti deka berandau enggau Pita tau sedia dua tiga changkir kupi baru ulih ninga iya nembuka sebaris ayat.

Tang perak jaku Timoti nya tadi enda ngasuh sida ke enggau iya berandau dia ngetu ketawa. Tak majak mih sida ketawa semina kurang agi pengginggar baka ke udah kena tagang. Baka orang ke kentut ke ngetatka diri nangika kentut nya bebunyi inggar.

Taja pan sida bela ketawa tang kasih mega sida meda pengelurus ati Timoti nya. Taja pan iya lurus tang iya tetap bisi semengat. Roh iya sigi semampai bekesindau pama semak udah deka pengawa bepilih besai. Udah lima kali tudah tuai bediri ngati kediri. Genap kali iya bediri genap kali nya ga iya lenyau duit chengkeram. Nya mih kebuah, bala tawing ke rapat enggau iya ngela iya YB Timoti Juau laban suah bediri taja pan alah belama. Agi keterubah suba, Timoti enda tentu setuju enggau gela nya laban iya enggai bemain-main enggau gela jaku basa nya. Gela nya ku penemu iya semina engkeman diungkup orang ke menang aja. Ukai utai dikena betundi bebuti nama YB nya ba runding tudah tuai.

Sapa ke enda ngelala. Orang ke tebilang ba Kg. Manipesto nya tinggi sereta kurus keringke. Tubuh iya abis dibalut ukir enggau pantang. Nyau begenarau ku orang. Pantang iya bisi ba lengan sampai ngagai berang. Bisi ba dada enggau ba belakang sereta ba betis. Sigi setipak bendar iya tampak rita jelai nama ketegal pantang iya nya. Peninggi iya pan engkeman enggau nama ke diberi apai seduai indai iya. Entah ari ni enda apai iya bulih penemu nempa nama ngemanah nya. Enti di sekula bala pangan iya suah ngangau iya Anjang tauka Panjang kelebih agi bala pangan iya ke bebansa Lawai.

Orang tu sigi agi regas, agi dapat taja pan umur iya udah lebih 70 taun. Genap kali musin bepilih besai iya bekimpin ke ulu sereta ke ili ngena motosikal besai ke dibeli maya bedau pinchin gawa suba.

Tang utai ti ngalitka ati nya, nadai siku orang di genturung menua nya ngumbai iya Aya Juau tauka Aya Timoti Juau. Enti nitih iya mih orang ke pengabis tuai umur ba menua sida dia. Dini bisi orang bukai. Enda ngira nembiak, iya ke baru ngangkatka diri bujang enggau orang tuai bela ngangau iya YB aja, baka ke iya nya ti amat-amat YB. Pelajar iya umbas iya tinggi – sampai pom lima. Iya entara nembiak ke tau dikumbai aktivitis ke regas maya sekula, entara orang ke ngeringka jaku Iban tang iya mega orang ke nadai bulih penguntung ari pengawa iya nya tadi sempama baka arang ke udah abis tang besi lalu enda bepijar. Taja pia iya tetap enggau prinsip iya nyadi orang ke lurus bendul. Kini-kini iya bejalai betemu enggau mensia mayuh iya tetap bejakuka pasal pemansang jaku Iban. Kini-kini iya nemuai iya sigi mantaika pasal pemesai reti ngenanka jaku Iban. Engka nya mih kebuah sida semenua chukup bebasa ngagai iya. Nya mih kebuah kini iya digelar sida YB Timoti Juau ti lurus.

“Kena aja mih, Tim,” pia ku sadang penemu sida semenua. “ Ukai nya bisi orang nawa nuan ketegal digelar YB.  Agi mega nuan sigi patut nyadi YB. Nadai orang bukai lurus agi ari nuan di menua tu. Amat mih nuan bisi makai suap, tang asi ke disuap nuan asil ari ke ditanam nuan empu. Enda salah nya, enda pia?. Orang bukai pan makai suap, tang ketegal nya dia sida lalu nyadi kaya. Nuan makai suap tang agi merinsa mensena. Kati nuan ulih menang dalam pengawa bepilih? Nuan mesti makai suap amai-amai baru nuan ulih menang,” ku Ikie ke tebilang bejaku enda bepampul. Iya betundi iya amat ga jaku iya nya.

Semua sida ke ba kedai kupi nya pan lalu ketawa baru, nyengkaum iya ke benama Ajit Anyan.

“Aku ukai nama, mina deka nemu enggau silik aja,” pia ku Ajit Anyan seraya ke ketawa. “Aku orang parti politik. Orang parti. Orang kuat parti politik. Sigi ringat mih aku pama orang ngumbai aku makai suap. Dini ulih nuduh orang sengapa enti nadai evidens. Kitai ga sama belajar munya ku Pengajar Jep suba pama nadai evidens bula mih nya. Aku pan beresi baka nuan mih Timoti. Nadai utai lutak udah ngemalutka pengidup aku.”

“Tang aku ninga dek kala untung mayuh maya pengawa bepilih besai empai lama tu tadi. Amat nya kini, akih? Ku siku orang ke enggai dikelala nanya iya.

“Tu mih kebuah aku melanja kita sekali tu,” pia ku Ajit sambil betempapka mija. “Ukai mayuh endar, tang aku mesti bekunsi enggau orang bukai mega. Ukai tak aku siku nenggali prujik nya tang ukai kitai ditu. Ga kitai tu sama Iban agi bisi ngemeran adat lama. Pama ngasu sigi bekunsi semeliung, pama napang endang bekunsi rintung.  Aku ngasaika pengawa tu sigi enda rugi. Kami bela bulih. Aku ke nangkap kontrek masang poster, orang bukai ga diasuh ngerubuhka poster. Sama bela bulih upah. Untung rugi sama dikunsi.”

“Untung nyadi orang parti enti pia,” ku Timoti Juau.

“Enti nuan udah nemu nama dih enda masuk parti kami? Lapa nuan dih?”

“Lalu bedau bisi seruan tu Ajit,” pia ku Timoti sambil ketawa, ayan ngeli batu dua igi iya. Iya ga ngeli nya burak ari ke bukai.

Sida bukai pan lalu nimbal ketawa iya. Balat agi ga munyi ketawa sida ke bukai.

“Enti nuan tak ngantika seruan, mapap mih nuan nya sepemanjai idup. Rugi sampai mati. Kereja bebendar, simpan duit dikena bediri. Enda gila kereja nya kini?”

“Aku orang aktivis, Ajit. Aku ukai sengapa orang. Ukai orang sebarang. Nuan nama utai temu nuan?” pia ku saut Timoti. “Orang baka aku tu udah nadai agi kemaya hari tu. Nya alai aku mesti majakka tradisyen orang-orang ke lurus bendul baka aku tu.”

Lalu tekala nya sida ba kedai kupi tak seraya ketawa.

“Apu, pama nuan Tim! Lawa amai nuan! Ngangkat selabit diri empu. Ni nuan tau baka nya! Nadai orang rindu meda kitai pama kitai baka nya. Lagi tak semina lawa kerubung aja tang enda perisi. Enti ba agama enda tau aa ... bejaku sumbung, ngeninggika diri,” lalau siku orang ke alim pendiau.

“Anang ngaul politik enggau agama.” Bisi ga orang nyaut ari tisi dinding.

“Minta ampun mih, ukai niat deka ngemaleka dek nya tuan . Aku enda ingatka dek bisi ditu ga. Nadai meda dek tadi, tuan.”

Nemu nya bisi ga orang ke alim enggau sida ba kedai kupi nya.

“Aku bejaku utai ke amai. Ukai muji diri,” ku Timoti Juau nguji ngenanka penemu diri. “Dini bisi poster aku mandangka aku benung sembiang? Ngayanka aku nya alim? Sembiang ba gerija. Gambar poster aku semina ngayanka aku nya ngepaika jari aja. Nya pan dikumbai kita sumbung pia?”

Semua sida lalu sereta ketawa lekik-lekik. Kik..kik..kik...

“Kira ok mih nya Timo. Aku pan alit ati baka ni Ajit tak tau ngumbai nuan sumbung,” pia ku siku orang ke seruran nanahka Timoti Juau.

“Nuan enda makai suap, enda lawa, nadai ngereja pengawa ti enda menyana nya kebuah nuan alah,” pia ku siku agi orang ngelama ke ari tadi lalu bedau didinga nyawa bejaku. Iya tu sigi orang ke enda pejaku tang bansa orang ke ngembuan mayuh penemu. Bansa orang ke seranta jaku. Di menua iya dikumbai sida enggau nama Ingki.

“Nya mih siti pengelemi bepolitik. Mimit-mimit lalu nadai semengat. Mimit-mimit lalu nadai semengat. Baka ni ulih mela orang ke mesekin papa? Enda ulih meri bantu, enda ulih nulung rayat enti baka nya. Uji peda ulih kita, Timoti tu. Kala nuan nulung rayat? Aku nadai pan kala ninga nuan nulung sapa-sapa. Lapa? Nemu nuan kebuah? Laban nuan nadai duit. Nuan nadai duit. Nadai duit sesen. Enti nuan deka main politik nuan mesti bisi duit. Mesti nemu masang strategi ngiga duit. Uji peda nuan baka Datuk ke ngarika kitai ke udah menang tiga kali ba sitak kitai tu. Nuan pan bulih baja pechuma ari iya. Kati nuan enda ingat pia?” Sigi dalam sereta mantik penemu unggal Ingki, dipeda baka ke runggu tang baka pengerunggu burung ensing, pama terebai nadai kala enda apus sungai.

Sida lalu sereta ketawa baru ninga jaku unggal Ingki nya.

“Ni wakil calon? Ni Richad Belitan?” ku jaku tanya ari siku orang ke enggai nama iya dibantai ditu. Orang ke benama Richad Belitan wakil calon nya semuti ngerising aja lebuh disebut nama.

“Anang enda ingat, nuan pan bulih paung empasa pechuma ari opis menteri, Richad!” ku sida mulaika pengingat sambil ketawa.

“Akai dai...kitai suah amat mangkit pekara tu,” pejah Timoti Juau baru. “Nya aku enda rindu. Aku pan bisi hak nerima bantu. Enti orang bulih Br1M aku pan layak munyi ku kaban aku Banie. Aku pan peranak mendam menua tu. Nengeri tu pan nengeri aku mega. Enda ibuh mih kita mangkit pekara lama. Nya perangai orang ke jai ati.”

Ninga nyawa Timoti Juau nyau majak inggar munyi injin kapal ari serumbung ke pechah dia sida lalu bela diau jenuh baka nyumbuh ke nangika ipuh, lalu bela diau sunyi baka babi ke nangika sangkuh. Enda berasai kedai kupi nya nyau baka kampung jerung ke nadai didinga ensung nyumbuh bujang, sunyi nadai didinga munyi nyawa orang. Timoti empu pan sama enda engkeretik udah ke mantaika pejah jaku anu iya.

Lebuh sida ke bela sengian, dia enda mukai-mukai bisi orang tama ke kedai nya. Iya lalu nabi sida ke dia sereta disempulang enggau nyawa ti nyaris madahka penatai diri. Semua sida ke dia bela tekanyat. Tegepang tekenyit ati. Nadai siku sida dia nyaut jaku tabi iya. Meda nadai siku nyaut dia iya lalu nandu jaku tabi iya baru.  Nya baru Timoti Juau nyaut enggau naka penguat. Nyangka sekali tu iya ngarapka semua orang ninga iya nya ke nimbal jaku temuai nya.

Temuai nya lalu ngenudukka diri taja pan baka orang ke mabuk enda ditumi, baka pengabang datai enda diambi. Lebuh ke ngenudukka diri iya berasai nangi sereta bisi ati tekenyit mimit meda sida ke ba kedai nya tak sengian nadai memunyi.

“Nama penatai aku tu ngachau kitaka?” tanya temuai nya.

“Enda. Enda. Kami semina tekanyat aja.”

“Nama aku Neil tauka Prof. Madya Dr. Neil Ambie, tukang analisis politik,” ku temuai nya madahka diri.

“Oh... nuan mih tuan profesor ke selalu pansut ba TV tu pia?” ku tanya didinga pansut ari tisi kedai.

“Ya..ya..” ku timbal bala bukai sama-sama gaga meda penatai iya. Enda sempat tudah tuai nyaut.

“Nyau munyi ke beli aku tu tuan, nama pejalai nuah dih tuan profesor?” tanya Timoti Juau.

“Nyadi aku ninga ba menua kita ditu bisi siku orang ke pegari tampak rita ke benama YB Timoti Juau ke alah pengawa bepilih lima kali berunggu. Nyadi aku tu deka betemu enggau iya enti ulih.”

“Ha..nya orang ke digiga nuan tuan profesor. Nya mih YB Timoti Juau.”

Prof. Madya Dr. Neil Ambi pan lalu begeguai nyurungka jari iya baru ngagai Timoti.

“Tu orang ke digiga aku ngelama tu nih,” pia ku iya bejaku enggau ati ti gaga. “Aku udah ninga cherita YB tu kira ke lama udah. Nya mih kebuah aku datai kitu laban deka bekelala enggau iya.”

“Apu bisi ai bekelala tu lagi,” ku bala bukai nimbal.

Timoti semuti tak tuchum lelegup aja.

“Nama tuju nuan deka betemu enggau aku dih, tuan profesor?”

“Aku tu deka ngerandau nuan YB. Aku deka nulis artikel sentang YB. Ulih aku berengkah diatu?”

“Ukai enda udah berengkah ngerandau aku nuan nya tadi?” pia ku Timoti bejaku sambil ketawa. Sida ke bukai pan lalu bela ketawa.

“Apu neh, nuan diatu udah tebilang, Timoti Juau. Nuan ila deka tampak rita jelai nama baka orang ke nyadi retis.”

“Bisi peluang menang pengawa bepilih besai musin baru ila enti pansut ba surat berita tauka TV. Tuan profesor pan selalu mih pansut ba TV. Tuan profesor selalu mantai jaku ti ngangatka pending, komen ti berani sereta jaku seriri. Nama sida enda nganu nuan kah?”

Prof. Madya Dr. Neil semina ketawa mimit aja.

“Bisi ga kena anu orang. Biasala kitai di menua tu.”

“Orang ke pandai baka profesor pan bisi ga kena anu pia?” ku bala ari tisi.

Prof. Madya Dr. Neil Ambi semuti tak tuchum aja.

“Nama kebuah YB agi majak bediri taja pan alah sereta lenyau duit chengkeram? Nama nya enda ngerugika nuan pia?”  ku munyi tanya Prof. Madya Dr. Neil Ambi.

“Udah nyadi hobi aku nya tuan profesor,” saut YB Timoti Juau. “Pama datai musin bemain pangka, orang ke rindu bemain pangka enda ulih tat agi mesti bemain pangka mega. Baka nya mega aku ke enggau orang ngantung nama bediri maya pengawa bepilih.”

“Nama utai ke deka dijapai YB? Nama mesej YB?”

“Nadai. Sigi tak rindu-rindu aja. Nadai mesej nama-nama.”

“Tang kami raban akademik meratika ulah YB tu baka ke orang ngelaban tauka ngayanka protes ti dipejalai nengah chara ti konsisten amat. Pengawa nuan tu YB ngambarka pengawa siku rayat ti ngelaban  nengah chara luar ari selama, ke diperagamka baka orang ke ngasaika diri ditipu tauka ditempayaka orang sepengudah pengawa bepilih besai. Enda pia runding nuan YB?”

Tebelenga lilih tudah Timoti Juau jamah jaku Dr. Neil nya. Sigi amat tebangkar profesor tu dalam pekara politik. Jaku ke dipansut iya baka kerudu ke nyepu dalam terumbu. Sigi ukai puda orang profesor madya tu. Nya kebuah iya seruran diambi orang mantaika penemu diri senentang pemansang politik menua.

Diatu baru Timoti berasai kesal di jungkal kandang atau, berasai nangi di jungkal kandang ati lebuh ke ngenang pulai jaku Dr. Neil Ambi nya. Tak enda berasai bulu pegu iya ngerenjang baka kayu ke rarat dibai ai sungai. Nadai sekali-sekali iya nyangka  tau diperatika orang ari sukut nya. Enda berasai YB Timoti Juau betubuh puchat bemua kelat.

Jaku tuduh ari profesor madya nya berat amat didinga iya, tau mai iya ke rumah pasung, tama jil ku jaku sida Banie tauka ditan baruh Akta Pengelikun Dalam Nengeri. Tikas pemuyan iya nyau majak-semajak.  Katika enda dih lebuh bala pangan ke bela ketawa enggau iya tadi tak bela sunyi baka babi ke takutka sangkuh lebuh ninga jaku ari Prof. Madya Dr. Neil Ambi nya.

“Enda..enda...ukai pia iya tuan profesor.” Bisi kekapat mimit munyi jaku YB Timoti Juau nimbal jaku Dr. Neil Ambi nya. “Mesai bulu mata, nadai mih aku bisi niat munyi ku nuan nya,” jaku bantah ari Timoti. “Aku sigi amat-amat semina main-main aja, deka ngenjukka diri mela rayat. Nya aja juluk ati aku. Semina deka ngenjuk diri mela bala rayat, ukai bisi nama-nama mesej ti besilup. Semina main-main aja.”

Tegenung baka empelekung ke mabuk ambuh Profesor Madya Dr. Neil Ambi ninga timbal ari Timoti Juau nya. Berasai mesa-mesu tudah tuai ninga jaku Timoti munyi nya. Enti orang ulih mendingka ati iya, tentu sida deka ningaka randau nenggali randau kediri iya ke nanya diri empu ke ngasaika diri udah diayahka YB Timoti ti pandai sereta bepeneleba enggau jaku ensuruk ti chukup tajam baka penajam buluh semilu. Amat kini iya diatu benung kena seriri enggau jaku ti tajam baka semilu nya?

“YB, nuan tu nyelai amat,” pia ku Prof. Madya Dr. Neil Ambi. Jaku iya bisi tendur mimit baka orang ke udah enda chukup stamina. “Orang ngelaban sereta betanding laban deka ngiga dengah, ngiga nama, ngaga reta tengkira, nyadi kaya nyadi raja, nyadi tuai ke ditambun puji orang sereta macham-macham agi kebuah bukai ke seruran didinga ditiu, dijaku tauka ditulis dalam surat berita. Tang nuan YB ngelaban semina deka bemain-main aja. Nama nya enda nyelai?”

Timoti Juau semina ngerising sereta berasai temegah.

“Amat, tuan profesor. Aku mina main-main aja. Nitihka musin baka orang ke bemain pangka. Pama padi murai udah badu ngetau bemain pangka mih bala. Nya aja.”

Prof. Madya Dr. Neil Ambi enda nyaut seleka mukut, enda malas seleka beras. Tekenyit bendar iya ninga bala sida sebuat dia tak enda mukai-mukai lalu ketawa enggau naka penyaris.

“Tim..Tim.” ku bala sida nyau munyi burung ke makai buah kara baru. “Orang bediri ketegal deka bekuasa deka nyadi kaya. Nuan ngelaban laban deka bemain-main. Patut mih nuan alah. Sapa deka milih orang ke lurus baka nuan? Lapar pungkang mih kami semua enti semua pemesai politik lurus baka nuan. Baka ni demokrasi ulih idup? Sunyi mih maya pengawa bepilih enti baka nya, enda charut baka selama. Rugi mih bala rayat semua, enda bulih pemansang. Enda bulih upah. Dini ulih baka tu. Parai kitai. Kami sigi minta upah maya kami ngundi.”

Tembu nya sida pan badu bejaku. Nya baru Timoti bejaku baru.

“Minta ampun semua. Aku gagit enggau orang pengawa bepilih. Alah pan enda ngawa ba aku. Ke rugi aku, ukai kita. Kita meri aku tujuh undi aja, lumur leka sampi, semina lekat ba selepak ngeli aku aja nya. Nyadika tinga. Balat enchadi kita nya. Landik bejaku aja baka kepayang ngadaka dilah. Jaku madah deka nyukung orang ke lurus tang enda ga kita ngundi orang ke lurus baka aku. Aku meri diri deka bebudika kita pan kita enggai. Kita ngiga orang ke ulih meri kita duit. Enda ngawa ga. Aku semina ngenjukka diri aku aja, rindu ati aja. Nadai salah enda pia? Minta ampun mih kaban semua.”

Nyau mesa-mesu tudah Prof. Madya Dr. Neil Ambi meda ulah bala peranak menua nya ke udah gila politik main-main nya. Iya tekenyit bendar lebuh iya nemu orang ke dikira iya pandai nya tak palui agi ari Apai Salui. Iya berasai enda lantang ati meda bujang berani ke deka diangkat sida nya semina siku orang ke pengabis jugau di menua nya. Meda utai baka nya dia dih iya lalu madahka diri deka mupuk.

Bala sida ke dia lalu seretai ketawa enggau naka penguat lebuh ninga Timoti nanyaka sida, “Ba penemu kita, nama profesor nya ila sigi deka nulis senentang pengidup aku?”

Lam Ng Kong ke ari tadi ngeredut kening baka ke bisi utai ditat tak enda mukai-mukai lalu ngelepaska bom WMD (weapons of mass destruction) ke ditat iya ari tadi ba mua mayuh.

Berenyang kedai kupi ketegal bunyi bala sida sebuat tachuh ketawa seraya ke nyumpah tudah Lam Ng Kong. Enda putus-putus bala ke nyumpah jaku jai sambil ngeludah. Bisi kedua nya nyau nutup idung.

“Belachan dek nya, Lam! Sengapa aja dek ngelepaska bom empasa ke bebaut but nya!”

Semua bala ke bisi bela ketawa. YB Timoti Juau pan ketawa ga sampai mata iya belai, senang ati meda bungah Lam Ng Kong nya.

“Tim, nya mih utai ke deka ditulis Prof. Madya Dr. Neil Ambi pasal nuan!” ku Ikie meri simpul penemu iya pasal cherita tu.

YB Timoti Juau semina ulih ngendas ai mata iya aja.