Karung Biru Ungkup Pengajar

“Sehari tu bisi kereja rumah diberi pengajar.” Pengawa betulis aku enda mukai-mukai tak ngechup enggau ngenyit laban bisi tawing aku balat bendar ngayanka diri gagit nerima penatai siku pengajar baru ke sekula kami. Aku udah ulih melaba ulah tawing aku nya lebuh iya betemu enggau pengajar ke sigat, tegap sereta agi bujang. Lalu gagit kediri. Sigi pama mega tawing aku nya. Enda tau meda lelaki sigat.

Keterubah pengajar nya tama ke kelas kami, iya dipeda aku begari kemas, chukup ngepan pengajar. Mata pelajar ti diajar iya ngagai kami munyi ke dipadah iya nya Bahasa Iban. Maya iya ke tama kelas kami aku baka ke ngemeluka iya lalu majak nembuka kereja rumah aku ti tejanggal enda lama ke nyau tinggal beberapa kerat agi seraya ke mendingka pengajar nya madahka tirai juru diri ba mua kami sekelas. Aku semina nemu nama iya ‘Pengajar Timo Bibo’. Aku tak ngelakka iya nyerita senentang tirai juru pengidup iya ngagai kami sekelas. Umbas iya mega pengelama iya madahka penatai diri. Aku empu gagau nguji nembuka pengawa aku dikena aku napi peresa Sijil Pelajaran Malaysia ke enda lama agi. Enda tentu bedulika penatai pengajar baru laban ba penemu aku pengajar ke dianjung ke sekula semampai datai pulai.

Aku bejalai ba kaki lima sambil megai ais krim ba jari kanan enggau bup not Biologi ba jari kiba. Aku kelalu bendar nguji ngapal nyentukka lebuh aku ngeleda jam udah pukul 11.15 pagi. Enda berasai udah jam 11.15 pagi ku ati aku din. Aku kiraka udah laun ngagai kelas Kimia nya. Ngeredungkan aku angkat sereta enda bepikir panjai, aku terus bejalai berumban-rumban ke kelas. Laban ti kelalu takut dianu pengajar, aku nyau abis ngelantak orang ngujungka ais krim ba jari aku nya tekena baju orang ke dilantak aku nya. Lebuh aku angkat malik ke atas baru aku tekenyit amat meda orang ke dilantak aku nya. Temati kutu aku maya nya.

“Minta ampun pengajar, aku enda sengaja,” pia ku aku madah ngagai Pengajar Timo sambil meremika pala aku laban malu. Chukup malu aku maya nya. Mua asai ke turun darah. Nadai utai ulih dikena aku nyeritaka pemalu aku nya.

“Enda ngawa. Nuan masuk kelas enggau jampat. Udah laun tu,” pia ku Pengajar Timo bejaku ngagai aku sambil ke ngendas baju iya enggau perecha. Aku terus mupukka pejalai aku enggau ati ti nesal. Berasai amai aku nya salah. Pekara nya balat amai ngemaluka aku laban mayuh bala tawing tepedaka pekara nya nyadi.

Aku sengaja mansa mua bilik pengajar maya kelas Kimia kami udah tembu. Sambil nya aku ngintai Pengajar Timo ari adap ke penjan. Tekanyat aku meda iya. Udah betukar gari. Aku berasai nesal enggau ulah aku nya tadi. Aku nguji ngemeranika diri deka betemu enggau iya.

“Tabi Pengajar Timo. Aku minta ampun ketegal hal tadi. Aku enda sengaja ngelantak nuan pengajar,” ku aku bejaku madahka diri enggau ati ti nesal indah enda baka orang ke ngampun penyalah ba mua paderi.

“Nadai ngawa nya. Aku nadai ngambi ati. Hal mit nya ba aku. Ila maya bejalai anang nyual mata,” lalau Pengajar Timo sambil tuchum. Aku berasai nyamai mimit ninga jaku iya enggau runding iya ti tebuka nya taja pan iya baru aku kelala.

Aku ransing amai meratika jam. Tinggal sepuluh minit agi ungkup aku betemu enggau Pengajar Timo laban iya deka tama kelas Bahasa Iban. Pama kelas Bahasa Iban aku sigi ransing sereta gagit deka belajar. Udah bisi sebulan aku belajar enggau iya ngujungka aku ngelala amai Pengajar Timo tu. Iya pemain volleyball tikas nasional lalu ngajar subjek Sains Sukan ba sekula kami. Subjek Bahasa Iban semina dikena ngemenuhka taga jam kelas kami. Iya suah becherita pasal peneleba iya bemain volleyball.  Iya mega baru masuk nyadi tukang tarak sepengudah ke tembu belajar ba UPM. Cherita iya nya balat ngasuh ati aku gagit agi deka bekelala enggau iya ke ujung agi. Nadai aku ngasaika pengawa aku tu diperatika tawing ke rapit enggau aku.

“Kemaya nuan tu tak gila ke Pengajar Timo?” enda mukai-mukai bisi sekali tawing aku Inu nanya aku. Aku tekenyit. Keterubah nya sigi enda tepansutka jaku. Nadai naga iya tau nanya aku munyi nya.

“Eh, dini bisi? Aku baka selama aja enggau Pengajar Timo nya. Kaul nembiak enggau pengajar bah,” ku aku nimbal enggau penuh pengarap awakka iya enda salah sangka sentang gerayak ati aku ngagai Pengajar Timo.

Tuchum lelegup aku sambil meratika bup diari aku. Tanda jari enggau jaku peransang Pengajar Timo ti dichukir sereta diberi iya enggau ati sereta runding ti tebuka.  Kenyau ari sehari nya kaul aku enggau iya nyau majak rapit-serapit tang taja pia nadai ditemu bala tawing aku. Genap jaku ti dipansutka iya semampai ngundan jaku peransang ngasuh aku bebendar belajar sereta meri pengadang ngambika aku mujur. Kadang-kadang bisi mega maya aku terunding bala pengajar bukai pan bisi meri jaku peransang tang enggi Pengajar Timo tu balat agi tama meresap ke dalam runding aku sereta lekat ba untak aku. Aku ngasaika jaku iya ngasi sereta semitan. Engka iya balat agi nemu sereta mereti runding aku ke agi biak tauka aku tu endang udah bisi ati ke iya. Aku lalu nutup bup diari aku nya lalu ngeleda pansut ngagai dunya realiti ari ke majak berunding pasal Pengajar Timo.

3 bulan udah nya ...

Sehari tu hari kepenudi Pengajar Timo ngajar kelas kami. Aku berasai sinu di leku kandang ati. Enda nemu agi gerayak ati aku maya nya. Perangai aku pan nyau baka ukui labuh anak. Enda nemu nama utai ti deka digaga. Sekejap kin, sekejap kitu. Enda lama ke atas, enda lama nurun ke baruh. Jari aku berasai chelap kangkang. Aku enda ulih tepansutka jaku sereta enda ulih merening mua Pengajar Timo. Taja pia berasai berat asai ati enti aku enda betemu enggau Pengajar Timo.  Ke bendar, aku patut balat agi fokus ngagai subjek ti deka diambi aku maya peresa Sijil Pelajaran Malaysia ila, ukai ngabiska awak bekenangka Pengajar Timo. “Nama mih jampat amai jam beputar maya aku benung lantang belajar enggau Pengajar Timo? Ku aku madahka serebana diri bejaku kediri berandau nenggali.

Aku selalu ngintai Pengajar Timo ari penjan, ngarapka iya mansa mua aku. Udah lama ga aku enda ulih berandau enggau iya baka ke dulu suba. Berasai bendar aku ngasai pengerindu maya kami selalu berandau lebuh nya suba. Aku sempat tepedaka Pengajar Timo ari adap penjan ba bilik pengajar sebedau aku pulai ke rumah. Semina meda Pengajar Timo ari adap belakang pan berasai tepantup gerayak ati aku. Puas mih taja pan sekejap.

“Lapa enda betemu aja enggau Pengajar Timo?” ku Inu tak enda mukai-mukai didinga aku nyadaka nyawa iya ari adap belakang. Nya balat agi ngemaluka aku. Aku semina nyakal  jaku Inu nya madahka diri enda ngelila Pengajar Timo. Tang ulah aku nya udah nyadi garuh ba Inu madahka aku bisi ati ke Pengajar Timo.

“Aku ngelala amai bakih aku tu. Ukai nya baru tua ke udah begulai. Nuan tu ke bendar udah bisi ati ke Pengajar Timo. Enda pia? Aku selalu meda nuan nimpai Pengajar Timo ari penjan. Enti nuan malu deka betemu enggau Pengajar Timo, ba penemu aku manah agi nuan nulis surat ngagai iya,” ku Inu. Badas amat peransang jaku Inu nya. Jaku Inu nya balat meresap ke dalam runding aku. Bisi pengamai ga jaku iya nya ku ati ku din. Diatu aku enda ibuh belalaika geragayak ati aku ba mua Inu. Udah mayuh ulah aku nyadika garuh ba iya.

Aku agi duduk nunga mija belajar taja pan jam udah pukul 1.00 pagi. Aku agi merening karung surat bechura biru. Kiraka udah dua minggu enggai aku ngarang surat nya tang aku lalu nadai bisi pemerani deka meri surat nya ngagai Pengajar Timo. Lebuh ke ngarang surat nya nyau abis jaku bebungai ke dipelajar aku dalam jaku Iban dikena aku mantaika geregayak ati. Nyau kepaus ke meratika karung surat nya aku lalu ngaga pemutus penemu deka meri surat nya pagila. Arap-arapka aku bisi peluang betemu enggau Pengajar Timo pagila mih. Aku lalu nyelitka surat nya ba diari aku.

Jam tinggal 30 minit agi sebedau pulai ke rumah. Aku lalu bedau ga ulih betemu enggau Pengajar Timo. Sepemanjai kelas Kimia, aku udah enda nyamai duduk agi baka ukui labuh anak. Ati dalam din nyau sengit-sengit. Udah tembu belajar, aku lalu terus begaut mai diari aku ke bilik pengajar. Datai aku din ... aku berasai putus pengarap laban nadai meda Pengajar Timo ba mija iya. Mata aku nya ligau-ligau ngiga Pengajar Timo ba dalam bilik pengajar nya tang senaya batang tubuh Pengajar Timo mimit pan nadai ayan dipeda. Kini enda penunga Pengajar Timo tu ku ati aku. Engka aku enda bepeluang meri surat tu ngagai Pengajar Timo sehari nya. Engka aku patut meri surat nya ngagai iya minggu dudi. Maya aku deka nyingkang pansut, aku enda sengaja bepansa enggau Pengajar Timo. Aku lalu terus nabi iya. Pengajar Timo nimbal tabi aku seraya tuchum ngagai aku. Iya lalu tama ke bilik pengajar. Niat aku deka nyuaka surat aku nya ngagai iya lalu tejanggal lebuh tepedaka pengiruh Pengajar Timo maya nya. Bisi mega ati aku terunding pengawa aku tu baka ke mantap tak nadai alai ngedar, baka ke nyala tak nadai alai nibar. Enda ngawa ku ati aku ngumbuk runding aku. “Minggu dudi agi bisi,” ku aku bejaku ngagai aku empu. Aku lalu mulaika diri ke rumah. Asa mih asai ati tang kati ku enggau.

Pagi nya aku udah besedia enggau diari aku besereta enggau karung surat biru ti diselit aku ba dalam diari nya. Surat ungkup Pengajar Timo. Aku udah besemaya dalam ati diri deka meri surat nya maya ngetu jam 10. Aku deka mai Inu nguluka aku nyuaka surat nya.

“Inu, ulih nuan nguluka aku betemu enggau Pengajar Timo?” ku aku nanya Inu.

“Lina, Pengajar Timo udah pindah lah minggu nyin kemari. Aku minta ampun laban enda madah ngagai nuan maya nya. Aku takut ke nuan asa ati,” ku Inu. Jaku iya nya ngasuh aku sengian enda lama. Teketu baka puyu mabuk keruh. Enda mukai-mukai aku lalu ngeledengkang angkat terus ke bilik pengajar. Amat. Datai din aku meda semua bup Pengajar Timo udah nadai dipeda ayan ba atas mija iya agi. Ba atas mija nya pan ukai barang Pengajar Timo agi peda aku. Dini? Ati aku berasai asa laban aku enda sempat meri jaku pesan selamat jalai ngagai iya ungkup kali kepenudi. Bendar aku merening karung surat biru ba dalam diari nya ke agi ba jari aku. Nyangka surat nya nadai selatan enggau Pengajar Timo. Aku nyingkang belubah-lubah ke kelas enggau penuh pengasa, sinu sereta rugang asai kandang ati.

3 bulan udah nya ...

Sehari tu hari kepenudi aku digela nembiak sekula. Aku udah tembu enggau mujur ngambi peresa Sijil Pelajaran Malaysia. Aku ngasaika jam jampat amai beputar. Mayuh amai memori aku enggau bala tawing sereta bala pengajar aku ba sekula nya ke semampai dikeingatka aku. Tu nyengkaum kaul aku enggau Pengajar Timo.  Taja pan Pengajar Timo udah ayas ari dipeda mata tang semua jaku lalau iya semampai idup dalam kandang ati aku. Pengadang ati ke seruran deka betemu enggau Pengajar Timo agi terus idup dalam ati kelimpah ari geragayak ati ti rindu deka berandau enggau iya baka ke dulu suba. Aku mimit pan nadai nyalahka Inu maya nya laban aku nemu niat ati iya manah tang geragayak ati sinu aku agi nampui betedai dalam din taja pan Pengajar Timo udah lama nadai dipeda.

Mata aku agi chakah merening mija ti kala alai Pengajar Timo suba. Enda abis-abis aku ngelila ari penjan bilik pengajar nya. Kada enda tu kali kepenudi sebedau aku nyingkang pansut ari sekula tu. Kaki aku terus nyingkang deka ngatur diri mupuk ari bilik pengajar. Deka pulai ke rumah.

“Lina, nuan nya?” dinga sada orang ngangau ari belakang. Sada nyawa nya ke ngasuh kaki aku lalu ngetu nyingkang. Aku terus mutarka tubuh aku deka meda sapa ke nengkau aku ari belakang nya. Asai ke kala ninga nyawa nya. Tekanyat ati lebuh tepedaka Pengajar Timo. Aku lalu nabi iya sereta nanyaka berita iya.

“Aku diatu udah nyadi tukang ngelatih penuh maya  ba sekula lumba enggau main, SMK Tabuan Jaya. Aku kitu laban bisi sekeda pekara ti bedau tembu deka dibina,” ku Pengajar Timo madah ngagai aku.

“Pia. Aku minta ampun laban enda sempat meri pesan selamat jalai ngagai nuan pengajar. Aku arapka nuan enda ngambi ati,” ku aku nerangka ngagai Pengajar Timo enggau ati ti nesal.

“Nadai aku ngambi ati dih. Aku pan baka nya mega enda sempat madah pemegi aku ngagai nuan maya nya suba. Aku meri tabi puji ngagai nuan enggau bala bakih nuan laban ke udah tembu ngambi peresa Sijil Pelajaran Malaysia. Taja pan pengawa nuan udah tembu ditu, tang anang enda ingat terus gata sereta gawa bebendar ngulihka juluk ati nuan,” pia ku lalau Pengajar Timo  ngagai aku enggau penuh peransang.  Kami duai lalu sama-sama bejalai nyentuk ngagai palan alai ngengkahka kerita.

“Lina, aku mupuk dulu. Aku arapka tua ulih betemu baru jemah ila,” ku Pengajar Timo bejaku seraya ke ngepai jari iya ngagai aku.

Aku pan ngepai pulai Pengajar Timo dataika kerita nya nyau ngereman ari timpai mata aku. Aku berasai lantang laban ulih betemu enggau Pengajar Timo taja pan betemu enggau enda disangka-sangka.  Tejapai mega niat ati ke deka meri pesan selamat jalai ngagai Pengajar Timo taja pan dalam awak ti serekat.

Engka amat aku kala nyimpan geregayak ati aku ke Pengajar Timo tang aku mesti bepikir chara rasional kelebih agi maya aku ke benung ngangkatka diri dara.  Enda patut ga aku nyimpan ati pengerindu ngagai pengajar aku empu laban aku empu agi digela nembiak sekula lalu iya mega digela pengajar. Kada enda Pengajar Timo udah bisi perambu  pengidup iya empu. Dini mih aku nemu.

Karung biru ungkup Pengajar Timo agi mengkang disimpan teguh dalam diari aku.  Kapa enda surat nya terus ngidupka tali memori aku enggau Pengajar Timo  ngambika awak enda madamka kenang aku enggau iya. Terima kasih ke semua memori taja pan sekejap aja.