Timoti Juau Dichiri Tokoh Antarabansa

Berita Timoti nengkua gela tokoh antarabansa balat bendar ngasuh ati bala iban ba genturung pendiau Emperan Ratai nya tekanyat. Baka ke ditinggang penusah tanah berenyang di Bam, Iran ke kala ngasuh mensia di sereta dunya tekenyit baka nya mih bala sida baka empau kena emba sema jaku lebuh ninga berita Timoti Juau udah diangkat nyadi tokoh antarabansa.

Bala mensia mayuh ba genturung pendiau Emperan Ratai keterubah iya sigi mati idup, telentang tungkup enda arap baka ni siku orang ke rurus ati lalu nyangka dipeda tambap mega ba penemu sida, tujuh kali udah alah pengawa bepilih besai sereta lenyau duit chenkeram tau tak dichiri nyadi tokoh ti dipebasaka serata dunya. Sapa iban deka pechayaka berita nya?

Nama kini kudi sereta biau balai ti mangka menua kitai tu ti alai bala pemesai semua idup lantang senang? Bala ke ditangkup penyeranta terus tusah laban enda diasuh berubah ketegal mayuh amat projek enggau bantu ditugung ngagai sida. Bebilion-bilion ringgit disemaya deka ditabur ngagai sida genap kali bisi pengawa bepilih besai milih perintah ti baru.

Nama kudi ke ngasuh YB Timoti Juau enda mukai-mukai lalu nyadi tebilang jelai berita. Tebilang serata dunya agi nya. Semua chinul TV dunya baka BBC, CNN, ART, Al-Jazerah enggau chinul tv bukai bela ngayanka berita pasal YB Timoti. Kenu ke cherita orang ke udah meda, madahka Timoti ke tinggi jejentam nya nyau luchi-luchi mua iya maya dikerandauka bala pengarang berita kelebih agi pengarang berita indu. Taja pia nadai mega dipeda malu tudah tuai betunga mua enggau bala pengarang berita indu. Kenu ku sida ke bisi ampit meda, YB Timoti Juau bejaku jaku Iban ari pun sampai ujung randau. Jaku iya disalin orang ke pandai dalam jaku English taja pan orang nya semuti didinga nyawa aja. Nyata amat tudah tuai udah ngalahka raban tuai pemegai menua ke bisi sekeda nya enda tentu lanchar bejaku Melayu, jauh agi ke nemu jaku English. Sida tu nadai empedu malu ke kekadang nyampur jaku sida enggau jaku English baka rojak ke diempa bala tambi ba langkau daja di kaki lima. Jaku sida tu kekadang ngujungka  nyau munyi adau. Tang YB Timoti enda baka sida nya. Iya orang ke endang angkun ngagai jaku Iban taja pan iya landik bejaku English enggau Melayu. Iya sanggup nyaut tanya pengarang berita ngena jaku Iban.

Ke raya amat ngasuh tekanyat nya lebuh semua krew chinul tv di serata dunya tak besun-sun seretai datai ke Emperan Ratai. Sigi aruh iya ngasuh orang tekenyit. Nadai kala pekara baka tu nyadi dalam sejarah genturung menua Emperan Ratai. Genap iku bala ba genturung nya nadai enda tekanyat meda utai ke nyelai nyengkaum jelu sida baka manuk, itit enggau jani. Jelu tu pan tekenyit laban semampai disuluh api terang maya ke nangkap gambar. Nama mih pengudi menua Emperan Ratai ke enda mukai-mukai nyadi fokus dunya.

“Sida ngiga WMD pelaba aku,” ku Pawie ke selalu agi bejaku bungah. “Asai aku sida tu ngiga Bunsu Bom.   

Nyau begau bala iban ba kedai kupi nya nyau munyi burung makai buah kara ngayangka pengeragak sereta ketawa ninga jaku bungah Pawie.

“Sida tu udah enda tetemuka WMD di Iraq dedin, nya sida nya kitu laban ngumbai Emperan Ratai tu bisi WMD.”

Tegenung sekejap baka empelekung mabuk ambuh bala sida ninga utai ke dipadah Pawie. Pawie ke bejaku nya nyau beguling kaping ningkap ba geladak kedai ketawa meda pemeli bala sida semenua ninga jaku iya nya.

“Pa tai WMD nya? Ukai Willie Martin Dikie?” tanya Ilam. Nyau deka meretas perut Pawie ninga jaku Ilam nya kelebih agi lebuh meda pemeli bala sida menua dikeduanka iya enggau jaku munyi nya.

“Weapons of Mass Destruction, ukai nya Willie Martin Dikie,” ku Pawie ngemetulka jaku Ilam nya.

Semua sida ke bisi dia lalu begau baru ketawa engkakah-kakah nyengkaum Willie Martin Dikie ke baru lima taun umur, anak tauke kedai nya empu. Iya dikangau sida Willie laban bisi elemen glamor ba nama iya, nya ga engkeman enggau chara baru mantaika orang ba tv kemaya hari tu. Ke bendar nama iya Williamson anak Martin Dikie, nyadi Willie Martin D, nama glamor ke digela apai iya.

“Lapa mih sida datai ke menua kitai dih? Aku irau amat.” tanya Markus ke dipeda bisi tetakut mimit. “Dini bisi senyata ditu?”

Laban Bunsu Bom enggau YB Timoti Juau ke nadai dia maya nya dia cherita ngelugi nya tak putus naka nya. Diatu bala sida majak betanya ngagai pangan diri nama kebuah tak bisi ubah utai nyadi baka nya. Semina YB Timoti Juau aja nemu entelah nya. Tang YB Timoti nadai enggau sida dia. Dini enda alai iya diatu?

Nyau kepuas nya baru sida semenua nya baka orang ke baru ngeleda ari luput. Udah beberapa hari baru bala sida nemu diri nadai tepedaka batang tubuh YB Timoti Juau. Nya baru sida nemu iya udah lelang nadai temu tunga. Kinika penunga iya meresap? Nya ke nyadika tanda tanya ba pala untak ba sida ba Emperan Ratai.

Penghulu Kasau ke baru dichiri mangku pengawa sepengudah pengawa bepilih pan enda nemu penunga YB nya. Katika enda, iya ga nyau gagau betunda-udi nitih burit YB ke amat ke ulu ke ili betemu enggau bala rayat seraya ke meri licha ngasuh bala rayat nya mansang.

Diatu YB ke bendar udah diasuh perintah bejalai ke rumah panjai betemu enggau bala rayat. Dini enda kiruh mih bala penghulu enggau tuai-tuai rumah ngambat penatai bala YB. Sida tu ukai nama bagas laban ngarapka ripot pasal sida nya manah laban kad ripot sida semampai diperesa orang di atas ba Putrajaya din. Ukai main takut bala YB itah bemain saham pan bala sida udah enda berani agi. Tambah mega nyau nadai hari.

Mujur ga pengawa ngemansangka rayat nya ukai pengawa ke tusah. Chukup mih pengawa bejalai ke menua ke dipegai sida sambil berandau enggau bala rayat lalu nyungkak sida bekereja bebendar, beserakup sereta nyeliah penemu bukai ti ukai datai ari mulut YB. Sida mega dipinta semampai nyukung parti ke megai perintah sepemanjai maya ngambika pengidup sida likun sereta lantang. Bala rayat ba menua pesisir mega seruran diingat genap lima taun diasuh nyunting parti sida dalam pengawa bepilih besai. Enti enda baka nya sida deka dichap ngelaban ngujungka nadai pemansang deka dibai ke menua sida. Sapa berani ngelaban?

Udah tembu ngemansangka rayat, bala sida ke besai-besai tu lalu betemu enggau pangan diri ba hotel-hotel ti besai mega, berandau enggau pangan diri ba restoran ke mar ari pagi sampai malam. Randau sida balat agi pasal agenda ngemansangka diri empu sepengudah ke lelak ngemansangka rayat. Kadang-kadang bisi mega maya sida merambu deka ngelabuhka orang ke enda dikerinduka sida ngambika pengawa ngemansangka rayat nya enda puntan.

Mayuh agi hotel besai digaga, ranchak agi ga bala raban pemansang rayat tu betemu enggau pangan diri. Tu nyau pindah ke hotel baru, berandauka chara mai pemansang ngagai sida ke patut nerima pemansang nya.

“Kami mesti deka nemu kini penunga YB Timoti tu,” tagih sida semenua nya ngagai Penghulu Kasau baka along ke nagih utang.

“Bala peranak semua, aku minta kita cheria mih dulu. Tatka ati kita dulu. Enti kitai gata nadai utai enda ulih dikereja. Agi mega aku benung nasat pekara tu,” pia ku Penghulu Kasau mujuk sida ngena jaku alus. Bisi chelap mimit mih bala sida ninga jaku penghulu nya.

“Kada enda iya bisi enggau orang matau menua dih?” tanya Pawie ke alit ati meda pengelenyau YB nya.

“Ni tau nuan bejaku munyi nya. Enda tau! Ba siti-siti sitak parlimen tauka kunsil nengeri semina siku aja YB.  Dini bisi dua iku YB?” pia ku Penghulu Kasau nya nyakal jaku Pawie. Bisi kasar mimit entak munyi jaku penghulu nya nyau baka orang ke udah deka ringat gaya. Nyau muyur pendiau iya dipeda sida. Cheremin mata iya pan nyau singit bai iya ke bejaku.

“Ba penemu aku badu mih bala kitai ngangau Timoti nya YB agi. Nya pekara ti salah aba undang-undang pengawa bepilih. Minta kita madah ngagai iya YB ke amat tu enda tentu rindu ninga kita ngangau Timoti nya YB.”

Tang orang menua Emperan Ratai nya enda beduli. Sida majak ngangau Timoti Juau nya YB Timoti Juau. Salah tauka enda, nitihka undang-undang tauka enda, sida sigi enda beduli. Iya tu mih tuai sida ke ngasuh sida temegah ati. Nambahka nya Timoti Juau diatu udah dichiri nyadi tokoh antarabansa. Penuduk iya diatu udah mugi amat dipeda sida.

Lebuh sida lina nganti tak enda mukai-mukai lalu ngechul Prof. Sangking Dr. Neil Ambie ke Emperan Ratai disempulang YB Timoti Juau. Datai ngenyit.  Datai enda madah. Nadai didinga jaku gerah madahka iya deka datai. Bala sida semenua tak tebelengga lilih, tekenyit tegepang ati laban enda sempat ngelalu penatai tokoh antarabansa sida. Taja baka nya bala sida gaga amat lalu terus ngerapat YB Timoti. Bala sida lalu ngambi peluang sama-sama begauk enggau YB Timoti dikena ngayanka pengelenggau sida ngelama tu.

“Kini nuan ngelama tu YB? Kami sekayu menua tu tak nyau deka putus pengarap meda nuan tak nadai temu tunga. Kini nuan YB?”

Prof. Sangking Dr. Neil Ambie semina tuchum sejeput aja merati ulah orang Emperan Ratai ke alit ati ke pengelenyau YB Timoti Juau. YB Timoti Juau bisi ketawa mimit ngayanka ngeli ke putih. Iya lalu nyeritaka pejalai iya ngelama ke udah enda ditemu sida semenua. Dipandakka cherita,  iya nya tadi nyau datai di sebuah studio Holywood ba siti kompeni Jipun ke ngaga filem kartun. YB Timoti Juau becherita madahka pendiau pengidup tauka biografi iya udah digaga kompeni Jipun nya nyadi cherita kartun. Siti episod udah tembu digaga.

“Ulih kitai meda enti bisi kereban pemain disk padat ditu,” pia ku Prof. Sangking Dr. Neil Ambie enggau ati ti gaga nguji madahka garuh nya ngagai bala mayuh. “Enti kita meda lagi, aku jamin kita semua deka ketawa.”

Bedau tentu abis ayat jaku iya tak enda mukai-mukai YB Timoti Juau dulu ketawa rakah-rakah.

“Ngelugi amai aku meda aku empu ngeluluka diri nyadi kartun. Enda ulih dicheritaka ditu. Bisi hari pechah perut,” iya lalu majak ketawa enggau naka penginggar sereta ditangkan bala sida bukai ke ketawa meda ulah iya ke chali nya.

Nyau inggar-seinggar amat munyi ketawa bala sida peranak menua Emperan Ratai ba kedai kupi nya.  Sida pan nyau enda ingatka kereban pemain disk padat agi laban udah enda begunaka nya agi ketegal orang ke bepengidup ngelugi nya diatu udah bisi ba mua sida. Maya nya mega sida pan enda mega ingatka pengawa ke deka betemu enggau YB ke bendar. Sema jaku enti diberi peluang pan bala sida enggai agi betemu YB ke amat nya laban tusah bendar deka ngaga temu semaya. Sida nyau dipejal ngaga temu semaya nengah Penghulu Kasau ke liat baka tulang ketapi nya.

Tang peranak menua ba genturung pendiau Emperan Ratai nadai ulih milih. Iya ke amat nyadi udah nya iya nya YB ke amat nya pan datai nandai betemu enggau bala sida dia maya nya. Penatai iya disempulang penghulu sida semenua, Penghulu Kasau. Ukai main agi pemanis mulut sereta pemurah tuchum YB nya. Taja pia tuchum ke diayanka iya ngagai bala mayuh nyau ngeredut indah enda ‘baka kenuyung manuk ke baru udah bira’. Nya sempama ke bisi digambarka ba cherita  siku penulis novel tebilang.

Orang be genturung pendiau Emperan Ratai enda ngelala sapa penempa sempama baru nya laban sida ukai pemacha bup litericha. Sida nadai ngelala raban penulis litericha kemaya hari, semina ke kala ditemu sida nya Ijau Lelayang a.k.a Aya Aire. Sida rindu ke iya laban iya tu orang ke pandai becherita sereta landik ngerenek utai lalu seruran datai ke menua sida munya maya menua agi kachau regau. Orang menua nya dini nemu siku penulis cherita ke silik amat meratika kenuyung manuk ngujungka iya ulih nempa sema banding ke udah nya lalu tebilang. Sida mega enda nemu bisi siku menteri ke udah diasuh pinchin gawa mengkang ulih tuchum betul-betul baka kenuyung manuk ke baru udah bira. Nemban amat sema banding klasik ditengkebangka penulis litericha ke enda dikelalaka sida Emperan Ratai nya.

“Kitai semua untung laban bisi orang ke baka Anggat Timoti Juau.”

“YB Timoti Juau,” ku timbal bala sida peranak menua Emperan Ratai nya lebuh ninga YB nya nyebut nama Timoti. Sida enda rindu tuai sida semina digela anggat aja.

“Sigi amat mih kitai semua untung ketegal ke enggau kitai diatu nya Anggat Timoti Ju... .”

“YB Timoti Juau!” nyerarat baru bala sida. Bedau sempat YB nembuka nama penuh YB Timoti lalu ditimbal bala mayuh.

Bisi siku orang lalu nelai YB. Udah nya YB dipeda baka orang ke bingung, baka orang ke tekanyat pan bisi, diperatika baka orang ke malu endang udah tentu laban iya enda meretika kebuah sida semenua nya nimbal iya munyi nya. Dipedaka mega iya nyau kesal ati lebuh orang betelai pekara nya ngagai iya.

“Okaylah, aku minta ampun ngagai bala kitai ditu. Kitai untung laban iya ke bisi enggau kitai ditu nya siku tokoh antarabansa, peranak asal ke diau mendam di menua tu ke udah mai pulai nama ke manah ngagai kitai ditu ke ngujungka iya nya bebendang tampak rita.”

“YB Timoti Juau! YB Timoti Juau! YB Timoti Juau!” munyi sada nyawa bala sida menua nyau betangkan-tangkan nyebut nama tuai ke ditemegahka sida. Sida apin puas ati laban ulah YB nya ke enggai ngela tuai ke dikesayauka sida nya ngena gelar ti udah diberika sida ngagai Timoti.

“Ya, ya, ya. Anggat YB Timoti udah mai nama ke badas ngagai menua Malaysia ba menua luar belalauka bantu ari Prof. Sangking Dr. Neil Ambie. Iya ke mai tokoh antarabansa kitai tu ngagai orang ke nempa cherita kartun di Holywood. Kitai diatu udah tebilang berita jelai nama ba serata dunya. Enti menua Jipun bisi samurai enggau ninja, kitai diatu pan enda kurang laban bisi tokoh pemerindang ke tebilang serata dunya, ti udah digaga nyadi filem kartun.”

Mayuh agi jaku puji bukai ari YB nya ngujungka bala rayat menua Emperan Ratai nya nyau leju ninga laban sida nyau aus sereta lapar, enda tan agi nganti deka makai enggau ngirup laban pemakai enggau ai irup udah disediaka Opis Pemadah. Nyau kepuas nya dia pengatur pengawa dipejal ngemandakka program sida lebuh meda sida semenua nya udah mupuk angkat nuju ngagai serudung ke alai pemakai nya dinah. Sida nyau enda ibuh dipadah agi. Engka udah lapar ngelama ke mendingka jaku YB nya.

Laban udah puas mendingka sepis YB nya tadi bala sida Emperan Ratai nyau nadai ati deka nemu cherita ke amat senentang pengelenyau YB Timoti Juau. Bala sida nya nyau masuk agi makai pemakai ke dibai sereta diidangka Opis Pemadah. YB ke amat nya bisi berasai enda lantang ati laban sepis iya tak dikerat pandak ulih pengatur pengawa ngambika iya enda tak bejaku nunga kerusi enggau mija aja laban orang ke duduk udah besun-sun mindah ke serudung pemakai.

“YB, maya bukai ga kitai ngadarka program baka tu baru. Aku ulih ngatur tu baru ila,” ku Mr. Jita Kaya, pemesai ari Opis Pemadah.

“Au ga enti baka nya. Ila sekretari aku nguntik nuan. Mayuh amai pekara ke bedau disebut aku. Puas ke dikachau bala mensia mayuh sepis aku nya tadi. Aku deka berandau enggau Timoti pan enda ulih. Meda iya nyau dipelulungka sida semenua,” pia ku jaku YB ke amat, nesal sereta enda tentu lantang ati.

“Aku minta ampun, YB. Aku enda nyangka tau tak baka tu penyadi,” ku timbal Pemesai Opis Pemadah nya seraya ke meratika bala mensia mayuh ke enda bebasa nya ninggalka YB nya kediri. Iya semina dikelingi raban pemesai ari opis perintah aja. Tang YB ke ukai YB amat nya balat agi diambat sereta dipebabasaka sida.

Geragayak ati ke enda lantang sereta muras YB nya enda lama laban udah nya Pemesai Opis Pelilih Menua mujur ngatur hari betemu rayat ba Emperan Ratai. Sekali tu YB Timoti Juau nadai ba menua.

“Genturung menua tu ila deka dikemansangka sereta digaga nyadi siti bandar teladan bansa ti baru ke udah lama diperambuka kitai ari suba,” ku YB nya. Sida menua nya pan bela nempikka jari ngayanka diri gaga ke perambu YB nya.

“Mina penanggul menua kita tu mekat amat, nadai naritka ati sereta nadai utai ke ulih dikemansangka perintah ditu,” ku YB nya nyau munyi ke ngemba sereta nyeriri peranak menua Emperan Ratai.

Sida pan nyau enda engkeretik baka babi ke takutka sangkuh, baka nyumbuh ke takutka ipuh. Sida berasai sinuka diri ninga jaku YB nya. Endang amat nadai utai ke naritka ati ba menua sida. Tanah mayuh tang nadai projek ngujungka tanah sida nya nyau tumbuh lalang enggau babas, kusi ransi sereta kering baka batu ti enda ulih dikemansangka agi. Nama utai ti ulih digaga bala sida?

“Tang enda ngawa laban kami udah mutus runding deka mega majak ngemansangka Emperan Ratai tu nyadi bandar teladan bansa ti mansang jemah ila. Diatu kitai udah bisi tokoh antarabansa ke ulih narit penatai temuai ari menua luar dalam timpuh dua taun.”

Ninga munyi nya bala sida semenua bisi berasai lantang ati ninga semaya YB ke amat nya. Tang sekejap aja. Bala sida mupuk sinu baru lebuh YB nya nampung jaku iya.

“Tang bala kita ditu nyau munyi salah jaku nadai nerima penguji moden, mungkal enda nerima perambu perintah ke deka ngemunaska penyeranta. Puas aku ke udah bejalai nelaga serata menua ba sitak aku ditu dia aku meratika kita ditu balat amat merinsa mensena. Baka ke disengaja nyadi miskin ngambika kita nyalahka perintah ke bebelanja bebillion-billion ringgit dikena munaska penyeranta ba menua pesisir. Bala kita ditu balat amat temegah ati laban bisi YB Timoti Juau, tang nama utai ti udah digaga iya ngelama tu ngagai kitai? Nama pemansang ke udah dibai iya ngagai kita ditu?”

Sida be Emperan Ratai nensam ke pala malu dikelanjaika YB nya ngena jaku ti tajam baka semilu. Abis semua jaku bungah, jaku ke ngelugi ngelama tu lela baka embun pagi hari. Nadai agi awak alai sida bebungah enggau pangan diri udah ke ninga jaku YB nya.

Nama utai ke dikumbai bandar teladan bansa? Taja pan sida enda mereti utai ke disebut YB nya, sida enggai nanya nangika dikumbai palui amat laban pekara ti deka ditanya sida nya udah disebut bala ke tebangkar dalam pekara nya beribu-ribu kali dalam radio enggau tv. Siang malam, pagi lemai bisi aja penerang pasal bandar teladan bansa disebut ba radio kelebih agi radio Wai fm. Nya kebuah, sida mutuska penemu semina tak nerima aja jaku YB nya lalu ngarapka projek nya sekali tu amat-amat nyadi lalu ukai jaku rugang ke dikena ngenyamaika ati aja.  

“Sengaja nyadi miskin maya perintah bepas-was munaska penyeranta nya pengawa ti salah amat kelebih agi ba adat bansa kitai,” pejah YB nya.

Baka bengkak lama ke nguyum jaku ke diayanka YB nya ngagai sida. YB nya nemu iya mesti kasar jaku dikena iya ngerakka rayat ke agi lina tinduk. Agi mega ukai nyamai ngayanka pengarap ngagai sida rayat menua pesisir laban ke udah lebih 20 taun sida tu nadai dikeibuhka laban ngelama tu tembu ngemansangka kandang nengeri enggau palan industri.

“Aku bisi dipadahka Penghulu Kasau, enda mayuh kita menua tu ke gawa bekuli di nengeri baka bekuli ngaga rumah, gawa ba kilang, kereja kapal, kereja ke tasik enggau kereja bukai mih. Enti kita deka mansang, kita mesti berani pansut ari menua tu ngiga jereki ba nengeri dedin. Enda ulih diau ba teluk dapur baka batu tungku belama.  Kita mega enda ulih ngarapka bantu ari perintah aja. Aku madah ngagai kita, pejalai beribu batu berengkah ari siti singkang serekat. Uji peda kita orang Kelantan. Sida pansut ari menua sida begigaka kereja, ngiga jereki ba luar Kelantan laban din nadai kereja. Peda kita bansa China sanggup gawa ke Sungaipo. Tu mih semangat ke patut diteladan dichuanka kita. Aku arapka kita ditu nyukung ngaga genturung menua Emperan Ratai tu nyadi bandar teladan bansa.”

Sida Emperan Ratai pan lalu betempapka jari gaga laban udah bisi peransang baru sepengudah bekali-kali disemayaka perintah madahka menua sida deka dikemansangka. YB pulai mai ati ti puas sereta gaga laban iya nadai agi dikachau sereta disekat maya bejaku ba mua mayuh pasal pemansang menua. Sida Emperan Ratai pan nyau bisi pengarap nerima projek Tinjau Pemansang 2050 laban sida ngelama tu udah dikemeluka perintah sepengelama 20 taun taja pan pemansang semampai disemayaka perintah.

Sida diatu lantang ati laban bisi projek baru ti udah disemayaka YB ngagai sida. Enggau geragayak ati ti puas sida ba genturung menua Emperan Ratai sanggup madahka diri enda nyadi mendingka penerang senentang pengelenyau YB Timoti Juau. Sida sanggup nganti hari bukai ke engkeman agi ba sida.