Aku lelengauka penampak

“PRANG” Dinga bunyi utai labuh ke geladak lalu pechah. Liman enggau bala tawing lalu ngeredungkan ngeretatak ari endur nya. Sida baru udah beduan siku nembiak baru sereta ngasuh beberapa singkap jenila kacha pechah. Ba belakang sida kiraka rapas dipeda mata bisi siku pengajar benama Pengajar Tomiti, pengajar disiplin sekula nya benung nyaup nembiak ke rebah ba atas tanah. Baju nembiak nya kamah lalu bibir mulut iya pechah. Tubuh iya abis rajai.

Liman nya siku nembiak pom lima ba sebuah sekula di tengah-tengah pasar Simanggang. Tebilang enggau ulah baka samseng ngujungka iya digela “Aka Taiko”. Iya anak tunggal tauke ke pengabis mujur di Malaysia.

“Man! Nama patut kitai gaga diatu? Parai kitai ... sekali tu, mesti kitai kena tangkap,” pia ku orang kanan Liman, Ningkan. Liman ngetuka pelanda iya lebuh sida datai di belakang sekula. Bakih iya ke bukai, Elam, Deli enggau Marius mega ngetu belanda.

“Bala kita anang irau ... magi pagila kitai begelumu ba mua sekula. Udah nya kitai lipak semak pasar raya. Kitai nukar baju, baru kitai mindah ari nya. Aku mai kerita aba aku,” ku saut Liman. Nadai tanda-tanda nyelai mimit ari chara iya bejaku. Baka ke nadai utai nyadi.

“Bah, nama utai ke patut kitai gaga diatu dih?” tanya Deli. Iya irauka Pengajar Tomiti ngaga jaku gerah minta sida lima datai ke opis. Elam enggau Marius ke ari tadi duduk sengian udah mupuk enda lantang ati. Duduk pan seduai udah enda nyamai nyau baka ukui labuh anak.

“Nama agi ... kitai lipak la. Aram!” ku Liman. Sida pan lalu pansut ari kandang sekula nya. Sida niki pagar sekula nya laban nadai jaga  nyaga endur nya. Sida lalu bejalai kaki ke palan Internet sereta ngabiska jam sida dia sampai chukup jam belajar di sekula.

Hari siti, Liman enggau penuh gata nganti bala bakih iya ba mua sekula. Jam ba jari iya udah nunjukka pukul 6.45 pagi. Sida mesti mindah sebedau bala nembiak bukai datai di sekula. Taja pia, nadai siku buntak bala sida tawing iya bisi dipeda ayan dia taja pan jam udah nya nyau deka pukul 7.00 pagi. Enda mukai-mukai, telefon binching iya pan lalu memunyi ngelaika bisi pesan whatsap ti baru diterima. Pesan nya datai ari Elam.

“Minta ampun Man. Kami enggai agi nitih nuan. Demalam sida sekula bisi nelefon apai indai kami. Kami kiraka enggai agi besulu enggau nuan.” Pia ku munyi pesan whatsap ke dianjung Elam. Sedekan tudah tuai. Tak nerekan munyi sedekan iya. Enda mukai-mukai lalu memunyi mega hon kerita ari belakang kerita iya. Siku lelaki ke berumur kirai-kira 40-an pansut ari kerita nya.

“Liman, aba udah nemu pengawa nuan di sekula. Demalam, sida sekula bisi nelefon aba lalu nyeritaka penusah ti udah digaga nuan,” ku Anggat Garan, apai Liman. Udah tembu iya bejaku tak pansut mih dua iku bodigad apai iya ari kerita apai iya. Sida lalu mejal Liman tama ke dalam kerita. Siku ari bodigad nya lalu ngambi kunchi kerita ari kandi tanchut Liman lalu ngidupka injin kerita nya. Iya udah diasuh Anggat Garan mai kerita nya pulai ke rumah. Nembiak ke baru ngenataika diri ba sekula maya nya tak semina meda aja utai ke nyadi nya.

Kenyau ari sehari nya, Liman lalu nadai agi nurun ke sekula. Bala bakih iya pan enda ibuhka iya agi. Sida semina meri perati ke berat ngagai peresa SPM ke enda lama agi deka datai. Sida udah jera enggau utai ke nyadi. Ketegal ke berundingka apai sida sanggup ke sekula lalu minta kasih ari kepala pengajar awakka bala anak sida enda dibuai terus ari sekula. Nya mih ke ngasuh bala sida sebuat berasai bendar sinuka diri. Sida pan enda nyangka apai sida ke nyadi tuai bilik ke dipebasa bendar sanggup ngapil ngagai kepala pengajar minta sida enda dibuai ari sekula. Sida berasai malu ke diri sida empu.

Beberapa bulan udah nya, Ningkan, Elam, Deli enggau Marius mujur napi peresa SPM. Udah ke nganti kira-kira lima bulan, sehari tu sida pan lalu nerima nerima pemutus peresa SPM sida. Nya mih pun pengidup sida. Taja pan pemutus peresa sida enda lati tang sida beterima kasih ngagai Petara ketegal ke pas dalam semua mata pelajar ke diambi sida.

Enda mukai-mukai tak datai siku lelaki ngampir sida sebuat. Tekanyat bala sida meda nya tak bakih sida Liman.

“A ... A ... A ... Aka Taiko, nama gaga nuan ditu?” tanya Deli. Iya nangika sida sebuat direkak Liman laban bulaka semaya ke deka betemu enggau iya taun nyin kemari.  Liman semina tuchum.

“Deli, enda ibuh mih nuan be”Aka Taiko” agi. “Aku udah nesal sereta ngaku penyalah diri,” pia ku timbal Liman ke disempulang enggau tuchum. Ningkan ke ari tadi baka orang ke imun baka ke nemu gaya enggau jaku Liman udah bisi berubah ari selama.

Liman lalu muka cherita ke udah nyadi ba iya empu.

...MALIK KE BELAKANG...

“Kini nuan deka mai aku, aba?” ku tanya Liman. Sepiak jari iya udah dikungkung bodigad apai iya. Iya nyau engkuda minta dilepaska sida.

“Aba enda nyangka nuan beperangai baka tu. Aba enggau mak nuan kelalu arapka nuan. Kami nyerahka kerita, rumah, reta tengkira kami ngagai nuan lebuh kami ba menua tasik. Nadai nyangka nuan nyalah gunaka gasa nya. Nasit manah aba bisi ngasuh Daniel nyadi pejilin meratika pengawa nuan. Aba sanggup pulai ke Malaysia lebuh Daniel ngeripot ngagai aba madahka sida sekula bisi nelefon iya,” pia ku jaku Anggat Garan apai Liman bejaku enggau ati ti nesal.

“Ni mak dih aba? Liman deka bejaku enggau mak.”

“Ketegal nuan aba diansak ninggalka mak nuan kediri-diri di Amerika din. Mak nuan mih ke ngatur pengawa dagang kitai din. Pekara ke nyadi tu pan mak nuan enda nemu.”

Enda berasai sida pan datai ba endur ke jauh ari pasar. Liman tebelengga lilih lalu merening ngagai apai iya baka ke minta penerang ari iya kebuah sida kia.

“Ketegal utai ke udah digaga nuan anang nuan ngumbai aba nuan tu deka ngelepaska nuan pia aja. Aba udah ngerijista nuan ba sekula tu. Palan nya dikumbai boys’ home alai ngubah ulah nembiak nyadi manah. Ditu, semua utai mesti digaga nuan empu. Ari betesah sampai ke nyumai. Enti nuan kelalah, nuan mega ke tusah. Ukai orang bukai.”

Udah nya, bodigad ke sama dikungkung jari enggau Liman lalu ngansak Liman pansut ari kerita. Siku agi bodigad lalu mai beberapa iti beg pansut ari belakang kerita. Anggat Garan lalu betemu enggau apai sekula ke nyaga sereta ngajar sida dia. Udah semua pengawa tembu diatur, Anggat Garan lalu bepesan meri jaku lalau ngagai Liman sebedau sida mupuk mulaika diri.

“Liman, nuan sekali-kali ngaga hal ditu. Ditu nuan seiku-iku nuan aja, sida mayuh. Sida udah lama begulai enggau pangan diri. Aba enggai meda nuan beduan bala nembiak ditu. Enti enda jaga nuan ila jamah aku.” Liman ditinggalka apai indai baka anak manuk ke udah nadai indai.

“Baka nya mih cherita aku. Kita enda nemu pemerinsa aku diau dia. Asai ke idup maya jeman niang Begiling kelia. Mandi ba telaga, iya ga nadai airkon. Enti deka ngena telefon kin ngena telefon rama ke jauh ari sekula. Genap hari pengawa aku ngaga kereja, belajar, ngaga kereja, belajar,” ku serebana Liman.

“Enti aku baka nuan nya sigi udah gila pan,” ku timbal Ningkan.

Liman madah ngagai sida sebuat iya berengkah ditisih sida bukai udah ke nemu cherita iya ke udu beduanka bala nembiak sekula. Nambahka nya mega iya empu mimit da agi deka makalka diri empu ketegal ke enda tan napi pengidup dia.

“Tang siku pengajar ke benama Elvis Sepawie balat bendar meri peransang pengidup ngagai aku. Iya mih ke ngajar aku jalai pengarap ke betul. Ba peresa SPM aku mujur tulihka 2A. Siti ari A nya Bahasa Iban,” cherita Liman seraya ke ngayanka slip pemutus peresa nya ngagai sida sebuat.

“Ooo ... pia iya nih. Kasih nuan Liman,” ku Ningkan.

“Munyi ku jaku tuai, enti ka alah enda. Tang tabi puji ngagai Tuhan aku gaga ke utai ti digaga aku diatu,” pia ku Liman.

“Apo..pama nuan Man, kenyau ke udah berubah tu nyau nemu ngena jaku dalam,” ku jaku uti Deli. Udah nya sida empat lalu mai Liman betemu enggau nembiak ke dikeduanka  Liman suba ke sampai patah tulang rusuk. Rikie nama nembiak ke dikeduanka iya nya.

“Aku minta ampun ngagai nuan, Rikie. Suba aku nembiak ke jai. Diatu aku udah nesal enggau penyalah diri,” ku Liman sambil nyerugang ba mua Rikie.  Ningkan, Deli, Elam enggau Marius bela enda pechayaka Liman ti sanggup nyerugang ba mua Rikie sambil nyabak.  Rikie lalu mantu ngangkatka Liman ngasuh iya bediri sereta merap tubuh iya.

“Puji Tuhan, nuan udah berubah, Man. Anang nuan irau, aku udah lama ngampun penyalah nuan suba,” ku Rikie seraya ke nempap belubah-lubah belakang Liman. Udah nya sida pan sama-sama betabi enggau Liman. Iya enda ulih enda pulai ke rumah laban apai iya udah ngerijistaka iya belajar ba sebuah universiti di menua tasik. Iya diasuh apai iya belajar pasal hal dagang. Sida sebuat lalu nganjung iya datai ke pagar sekula.

Liman ngepaika jari iya ngagai sida sebuat seraya ke meraka jalai sebedau lampu trafik pejalai kaki betukar gadung. Iya bejalai nuju kerita ke diparking iya ba tebing jalai. Lebuh iya tengan meraka jalai, enda mukai-mukai datai sebuah lori kayu enggau naka pengelaju. Deriba lori nya enda sempat nekan brek lalu ngelantak Liman. Ketegal nya, Liman lalu tepelanting beberapa meter ari endur nya. Bala bakih ke meda pekara nya nya tegepang tekenyit ati. Sida sebuat lalu beguai-guai belanda ngagai Liman ke nyau gegaring ba atas jalai raya. Deriba lori ke ngelantak Liman pan pansut ari lori iya lalu nuju Liman. Udah nya iya ngeluarka telefon binching iya lalu ngangauka ambulans.

Rikie mangku pala Liman lalu diengkah ba atas pah iya. Iya sinu meda tudah Liman. Liman nyau lemi pendiau nyau jejengap baka manuk sabung ke udah balat disembelih. Pala iya nyau kilai-kiai. Baju iya nyau ambis dibalut darah.

“Aku enda nyangka baka tu chara kitai beserara enggau pangan diri. Minta ampun ketegal semua penyalah enggau penyilap aku ngelamat tu,” ku Liman. Iya lalu meri pemeri ti pemadu manah ngagai sida sebuat – tuchum. Udah nya iya lalu ngapuska seput ba pah bakih iya. Mua iya chiru baka ke nadai nama-nama.

Enda lama udah nya, sebuah ambulans ti ditangkanka beberapa buah kerita polis lalu datai kia. Tempat nya lalu penuh enggau bala mensia mayuh nyau munyi ke pechah akit. Jalai pan lalu sekut. Kerita nyau majak mayuh sereta lubah. Sida lima nya diambi statemen lalu deriba nya dibai ke balai polis. Nya mih kepenudi iya sida betemu enggau Liman. Danjan mih Liman dibai bulan, lesi nyenggai hari.