Cherita Musin Bah

Aku uchu Tedung. Nyadi aku deka nyerita siti jerita ke nyadi jeman aki ini kita bedau ada ke dunya. Nyadi jerita tu nyadi ba sebuah genturung pendiau. Nyau puas ke diau ba menua nya diau sida ke diau dia nyau berasai leju, berasai enda nyamai agi. Menua sida tu likun, nadai nama-nama, nadai pengachau, nadai ampuh bah, nadai kemarau. Tanah lati, manah alai nanam utai. Semua utai tanam tumbuh galak. Sida pan nadai kala serebana suntuk pemakai. Nadai kala lapar pungkang.

Engka ketegal empa penyamai idup dia sida semenua tak berunding baum ngiga siti pemutus penemu. Sida pan lalu begelumu baka lempaung ngambung di batang ba ruai tuai rumah. Nyau kepuas ke berandau setengah malam enggai, sida pan lalu teulihka runding. Sida sama-sama selubang penemu deka pindah ari menua nya lalu berumpangka kampung puang ngaga menua baru.

Taja pan baka nya, sida serumah lalu bedau nemua ni baka endur ke alai sida bemenua nya. Nya mih sida nyau sebening lalat berundingka tukuh menua baru sida. Kati enda dih; deka pindah tang enda nemu kini tunga. Tang laban ke bisi tuai rumah ke pintar, penanggul nya ulih diputarka enggau lengkas.

‘Dinga kita bala nembiak, malam tu aku minta kita nyikap diri bekemas. Pagi ila udah teberingkas tawas kitai serumah deka pansut ari rumah panjai tu. Kitai sama-sama ngiga palan endur diau ti baru. Kati setuju kita?’ pia ku tuai rumah nya bejaku ba mua mayuh.

‘Kami setuju, tuai.’ 

‘Kami nyukung 100 peratus.’ 

‘Yahoo, kitai pindah ke menua baru.’

... Ujung-ujung ...

‘Huih, lelak amai tu. Nika maya tu datai?’

‘Dinga semua!! Pelabaka aku kitai udah datai ba endur ke patut alai berumah,’ pia ku tuai rumah madah ngagai anak-nembiak iya.

‘Udah temuka tuai? Ni iya dih?’

‘Udah datai mih tu!’ ku tuai rumah merak enggau nyawa ke naka penginggar.

‘Badas, badas, puji suh petara!’ ku bala sekeda.

‘Nya aa ba mua nya.’

‘Apu neh, tanah lempa, semak tebing sungai ke chiru. Manah tu.’

Lalu begau mih sida dia gaga teulihka palan pendiau ke baru.

‘Okeh ... nama utai dianti agi? Dirika langkau, kitai ngagai endur tu nyadika genturung menua ke baru,’ pia ku tuai rumah ngansak sida serumah.

Udah ninga jaku perintah ari tuai rumah, sida pan lalu berengkah ngereja pengawa mungkal menua. Bisi nya nebas babas bauh, bisi nya nebang kayu. Bisi nya lalu beramu dikena ngaga rumah. Mayuh macham pengawa laban tubuh ke sigi mayuh. Pama nembiak redak tuai rumah tu; ukai tak mayuh tai nyumbuh, banyak tai badak. Sida ke dia nyau chapuh munyi ke ngaramka tubai. Tang maya orang ke nyau kisuk keduk dia tak didinga nyawa orang bejaku nanya tuai rumah.

‘Tuai, tau aku nanya mimit?’

‘Tanya mih dia, nadai salah. Tu ga menua demokrasi, free speech bro,’ pia ku saut tuai rumah. 

‘Lapa kitai mungkal menua ba lempa tu? Enda manah agi enti kitai berumah ba atas bukit nyin?’

Enda mukai-mukai, nyawa tadi ke nyau tachuh diatu nyau sengian baka ba kampung puang nadai didinga ensung nyumbuh bujang. Nadai engkeretik. Ku jaku sema, jarum labuh ke tanah pan didinga maya tu.

‘Nitihka penemu enggau runding aku ke tuai, ke dulu ngetup garam ari dek, palan tu mih pengabis engkeman alai berumah. Tanah ami manah alai bekebun, bumai betaun. Ai chiru, beresi tauka ai irup. Bah nama penanggul nya?’ ku tuai rumah nimbal nembiak nya.

‘Tang enti kitai berumah ba tuchung bukit, kitai ulih meda utai ke baruh. Tu beguna dikena nyaga pengelikun kitai serumah, tuai.’

‘Bah, di baruh tu enda likun pia? Aku orang tuai di rumah kitai. Aku mayuh peneleba. Aku dulu makai garam ari dek. Nemu aku nama utai digaga; enda ibuh nuan madah,’ nyau tinggi-setinggi munyi nyawa tuai rumah.

‘Ukai pia...tuai.’

‘Enti bisi kita ke enda puas ati alau mih kita diau di tuchung bukit nyin. Enda aku nagang kita dih,’ pia ku tuai rumah mandangka diri bisi penemu demokrasi ngagai nembiak iya.

Laban ke tegap enggau runding sida empat iku diri setawing nya lalu mupuk nyurutka diri ari sida bukai lalu mutus ati pindah ke tuchung bukit ke enda bangat jauh ari menua ke benung dipungkal sida serumah.

‘Bah, nama tu tak kitai empat aja dih? Kati ulih kini kitai berumah kediri ari kaban belayan kitai ke bukai?’ pia ku tanya siku ari sida nya.

‘Ngena kuasa tat, alah bisa ketegal biasa, bro. Riri enda tan,’ pia ku siku ke tuai agi ari sida bukai. Iya ke mungkal nanya tuai rumah nya tadi.

Datai sida empat di atas din, sida lalu berengkah muai agang, muai batang, muai lemetak, muai unak.

...........................................................................................................

Hari beganti hari, minggu beganti minggu, bulan beganti bulan, taun beganti taun. Nyau lama kelama menua sida ba lempa nya pan nyau majak mansang, majak nyegang. Majak maju. Utai tanam nyau galak amai tumbuh. Utai tupi pan nyau majak beranak betelesak. Menua sida nyau majak pegari nama jelai berita.

Menua sida empat iku di tuchung bukit nya mega nadai ga kurang. Sama bela maju. Sida empat pan sama-sama bebendar ngemansangka menua sida. Taja pia lebuh ke bisi awak sida nurun ke baruh dia sida empat suah amai dikelese sida serumah. Tang sida tetap ati enggau penemu sida ke milih tuchung bukit nyadika palan alai diau.

‘Pu, nyin orang bukit dah datai.’

‘Hehehe... orang Bukit Belachan.’ 

Tang enda mukai-mukai bisi sekali, tak ujan mih hari. Ukai ujan beris-beris. Ukai ujan nyala. Ukai ga ujan panas. Tak ujan tutuh pauh. Ujan nyau munyi diruruk. Ukai tak sehari tang nyau behari-hari ujan. Jelungan semua pengawa sida di lempa.  Nadai siti utai ulih digaga.

Malam siti tak didinga utai semerap. Balat amai munyi ke ngempaska pitan atap. Enda lama udah nya didinga nyawa orang rauh-rauh nyabak. Bisi ga munyi orang rauh-rauh minta tulung.

‘Tulung! Tulung! Tulung!’

Hari siti ... Balat tekenyit di jungkal kandang kamai sida empat lebuh menua di ba lempa nya nyau nadai agi dipeda. 

‘Apu wai! Nama udah nyadi?’ pia ku siku ari sida empat iku ke ba tuchung bukit lebuh meda utai ke baruh.

‘Parai kitai.’ Sehari nya baru sida nemu lempa nya udah dianyutka bah besai malam tadi. Diatu menua nya semina tinggal ai enggau pantai mudai aja.